„Се повторуваат истите случаи на неконтролирано возење со години, се повторува неказнувањето и недолжното згаснување животи. Фрустрирани од состојбите што не се менуваат, повикуваме на изразување граѓански револт. Системот ги отфрла децата и младите кои поради недоволна грижа го избираат погрешниот пат“, се вели во најавата на протестот „Кој е следен?“
Под мотото „Кој е следен?“, утре во 17 часот, на булеварот „Партизански одреди“ кај Универзална сала, ќе се одржи протест поради жртвите на скопските сообраќајници. Организаторите на протестот посочуваат дека случајот со Фросина Кулакова не е изолиран.
„Се повторуваат истите случаи на неконтролирано возење со години, се повторува неказнувањето и недолжното згаснување на животи. Фрустрирани од состојбите што не се менуваат, повикуваме на изразување на граѓански револт. Системот ги отфрла децата и младите кои поради недоволна грижа го избираат погрешниот пат. Институциите не се координирани и тоа доведува до млади кои не ја добиваат потребната поддршка за да бидат активни чинители во општеството. Тој недостиг на поддршка резултира со сѐ почести фатални последици“,
се наведува во најавата за протестот.
Протестот, посочуваат организаторите, има за цел да адресира три главни проблеми: нефункционалност на системот за заштита на децата и младите кои се во судир со законот, недоволна безбедност во градовите, глорификација на девијантно однесување и алките во системот за работа со деца и млади во судир со законот што не функционираат.
„Институциите не настапуваат координирано за идентификување на младите во судир со законите, а тие кои веќе се идентификувани не ја добиваат функционалната грижа за да се изградат во корисни и чесни граѓани на општеството. Дополнително, урбаната инфраструктура не ја осигурува потребната безбедност. Неопходно е градовите да можат да гарантираат безбедни услови за живот“,
се посочува во најавата.
За крај, се додава во соопштението, од исклучителна важност е да се поттикне јавната свест кон гласно осудување на глорификацијата на девијантното однесување.
„Круцијално е да се информираат граѓаните за последиците од возвишувањето на неказнивоста и заобиколувањето на правилата“,
велат од „Кој е следен?“.
Со палење свеќи и положување цвеќе, граѓаните и денеска ѝ оддадоа почит нa Фросина Кулакова од Неготино, која беше прегазена додека поминуваше пешачки премин на булеварот „Партизански одреди“ во близина на Универзалната сала во Скопје.
Дваесет и двегодишната девојка пред три дена беше прегазена од дваесетгодишниот Васил Јованов од Скопје, кој возел пијан, без возачка дозвола и минал на црвено светло, додека таа минувала на пешачки премин.
На 20-годишниот скопјанец осомничен за смртта на Фросина му беше определена мерка притвор од 30 дена, а за него и претходно имало кривични пријави за друга сообраќајна незгода и за недозволена употреба на дрога.
Граѓаните на мирниот собир и вчера запалија свеќи и положија цвеќе пред фотографијата на Фросина. Преку написите како „Врските не враќаат човечки живот“ и „Не е несреќа, туку убиство“ тие побараа одговорност од институциите за Фросина и за сите жртви во сообраќајни незгоди.
Мирен собир вчера се одржа и во Неготино, родниот град на Фросина. А протест е закажан и за утре во Кавадарци.
Освен Фросина, на 20 јануари 2022 година на пешачкиот премин кај крстосницата кај трговскиот центар „Скопје Сити мол“ беше прегазена и студентката Викторија Николова, а на 3 април 2015 година студентката Фросина Цековска на пешачки премин кај Универзална сала.