Од СДСМ велат дека ова се случува додека министерот за здравство шета низ САД и објавува слики од рекламни паноа
Од Социјалдемократскиот сојуз на Македонија (СДСМ) сметаат дека недостигот на лекови за пациентите од Клиниката за радиотерапија и онкологија е алармантен проблем.
Во денешната реакција од СДСМ, која доаѓа по информацијата од пациентите дека немаат биолошка терапија, се вели дека станува збор за лекови кои буквално значат живот за пациентите со метастатски канцери.
Од СДСМ велат дека ова се случува „додека министерот за здравство се шета по САД и објавува слики од рекламни паноа“.
„Ова е недозволиво и е уште еден доказ за неспособноста на владата на Мицкоски и министерот Таравари да се справи со елементарните потреби на граѓаните и здравствениот систем. Наместо одговорност и навремено снабдување, гледаме само изговори и административни препреки кои ја продлабочуваат кризата“,
се вели во соопштението од СДСМ.
Оттаму во реакцијата бараат итно преземање мерки за обезбедување на потребната терапија за сите пациенти и прашуваат дали оваа влада, за која велат дека ги троши народните пари на мебел, коли и луксуз, има барем малку одговорност кон граѓаните чие здравје и живот се загрозени.
„Наместо да обезбеди навремено финансирање и планирање на набавките, владата дозволува недостаток на есенцијални лекови и оставени пациенти на милост и немилост. Владата нема право да ризикува со здравјето на граѓаните. Оваа ситуација е последица на системски хаос и лошо менаџирање со здравството. Граѓаните заслужуваат здравствен систем што ќе ги штити, а не ќе ги загрозува“,
велат од СДСМ.
Пациентите од Онкологија велат дека од петокот немаат биолошка терапија, односно лековите „atezolizumab (tecentriq)“, „bevacizumab (avastin)“, „palbociclib“, „ribociclib“, „fulvestrant“ и „cetuximab“. Пациентите стравуваат дека за брзо време може да ги снема и „trastuzumab emtansine (kadcyla)“, „nivolumab“, „cobimetinib“ и „vemurafenib“.
Причина за недостигот, како што велат, е тоа што Клиниката за онкологија не е во можност да одговори на зголемувањето на бројот на пациентите со метастатски канцери.
Од Универзитетската клиника за радиотерапија и онкологија во Скопје во врска со овој проблем на пациентите велат дека е резултат на административни процедури, што се реализираат согласно буџетот за 2024 година.
Во врска со предизвиците поврзани со тендерските постапки, како што информираат, веќе се преземаат мерки за подобро планирање на набавките и поедноставување на процедурите.