Детето по падот веднаш било префрлено во прилепската болница, а потоа е транспортирано на Детска хирургија во Скопје. Констатирани се повреди на пршлените и на петиците на нозете
Ученикот што вчера попладне падна од прозорец од трети кат на основното училиште „Гоце Делчев“ во Прилеп се наоѓа во стабилна здравствена состојба и е надвор од животна опасност. Ова денеска за „360 степени“ го изјави директорот на Клиниката за детска хирургија, д-р Лазе Јовчевски, посочувајќи дека детето е примено во болницата во текот на вчерашното дежурство.
„Направени се сите потребни прегледи и снимања. Детето е надвор од животна опасност. Има повреди на пршлените и на петиците на нозете. Ќе ја следиме неговата состојба“,
рече д-р Јовчевски.
Како што објави порталот „Маркукуле“, ученикот по падот веднаш бил префрлен во прилепската болница, а потоа е транспортиран на Детска хирургија во Скопје.
Според информации на ТВ Канал 5, несреќата се случила за време на големиот одмор во втората смена, кога најголем дел од учениците биле излезени во дворот на училиштето.
Засега не се познати причините на несреќата.