„За вакво сериозно обвинение што се поднесува, еве, можам конкретно да кажам за мојот штитеник Љупчо Палевски, Обвинителството треба да има докази. Денеска четири часа изгубивме за да гледаме како количиња се шетаат низ Скопје во магла и да ни објаснуваат како се движат по скопските улици. Сами видовте дека немаат преземено елемент на дејствие кое е предмет на кривично дело“, рече адвокатот Страшевски во изјава за медиумите по завршувањето на денешното рочиште од судскиот процес за убиството на Вања Ѓорчевска и велешанецот Панче Жежовски
Приговорот на Палевски, по кој тој најави дека ќе бара изземање на, како што рече, целото Основно јавно обвинителство Скопје, се однесуваше на листата на докази на Обвинителството. Според него, на неа има докази кои се дуплираат и му порача на Обвинителството да „си ја среди“ листата
По презентирањето на движењето на на возилото „ситроен“, кое според Обвинителството било користено во грабнувањето на Вања Ѓорчевска, на денешното рочиште од судскиот процес за убиството на девојчето и велешанецот Панче Жежовски се гледаа и снимки од маршрутата на „реното кангу“, критичниот ден на 27 ноември 2023 година.
Што покажаа снимките од „Сејф сити“ за движењето на „ситроенот“ и „реното кангу“
Според видеоснимките од системот „Сејф сити“ (Безбеден град) што ги презентираше и образложуваше обвинителката Жаклина Крстевска-Јосифовска, возилото „рено кангу“, утрото на 27 ноември околу 6 часот и 25 минути, е забележано како се движи по улицата „Бутелска“ и булеварот „Христијан Тодоровски-Карпош“, а потоа по булеварот „Цветан Димов“ кон Центар. Кај „Мавровка“ во 6 часот и 29 минути врти по булеварот „Гоце Делчев“ кон мостот „Гоце Делчев“ од каде што продолжува кон булевар „Партизански одреди“ кај Соборниот храм, кон Карпош. Се исклучува на улицата „Ленинова“ во Дебар Маало.
На друга видеоснимка од вкупно 18, колку што содржеше овој сет снимки, возилото „рено кангу“ во 7:30 часот, како што наведе обвинителката, се гледа како се движи во Дебар Маало и со вртење лево се вклучува на булеварот „Илинден“, на место на кое според сообраќајните знаци не е дозволено свртување во лево.
Потоа возилото на крстосницата на булеварот „Илинден“ со улицата „Наум Наумовски Борче“ се забележува како продолжува по „Илинденска“ кон Зоолошка и врти десно по булеварот „8 Септември“ кон мостот кај „Александар палас“ во правец кон Момин поток.
На две од снимките, како што наведе обвинителката, може да се види дека во него има само едно лице, односно возачот.
Претходно на денешното рочиште се гледаа снимки, исто така од системот „Сејф сити“, за движењето на „ситроенот“, сопственост на Панче Жежовски, а поради кој, според обвинението, тој бил убиен.
Беа презентирани неколку сета снимки од движењето на ова возило. Едниот сет од 24 ноември 2023 година кога, според Обвинителството, бил првиот обид за грабнување на девојчето, кој пропаднал поради сообраќајниот метеж.
Рутата одела од улицата 102 во Маџари, па преку Трингла во Маџари и се упатува преку булеварот кај ТЦ „Мавровка“ и Кривичниот суд, а потоа преку мостот „Гоце Делчев“ кон булеварот „Илинден“. Оттаму „ситроенот“ се упатува на улицата „Наум Наумовски Борче“ каде што се наоѓа зградата каде што живеела Вања. Истата рута била користена и критичниот ден на 27 ноември, кога Вања е грабната.
И на овие снимки е уловено движењето на „ситроенот“.
Единствената разлика е што на критичниот ден, односно на 27 ноември, возилото тргнало од населбата Бутел, наместо од Маџари. Во Бутел било преместено два дена претходно, на 25 ноември.
„Во 6:33 часот се гледа возилото како се вклучува од мостот ‘Гоце Делчев’. Снимката 8 се однесува на крстосницата кај Владата. Се гледа возилото ‘ситроен’ како застанува на семафорите. Во видео 9 се гледа ‘ситроенот’ како во 6:35 часот ја поминува крстосницата и се упатува на бул. ‘Климент Охридски’. Потоа доаѓа на крстосницата со бул. ‘Партизански одреди’, при што се движи кон улица ‘Орце Николов’ кај бензинската на ‘Макпетрол’. Во видеото 11 се гледа крстосницата на булеварот ‘Илинден’ со ‘Наум Наумовски Борче’. Се забележува како навлегува возилото од улицата ‘Михаил Цоков’, подзастанува кај хотелот ‘Парк’ и продолжува до улицата ‘Наум Наумовски Борче’ каде што е зградата на оштетената Вања Ѓорчевска. Ова е во 6:37 часот”,
наведе обвинителката.
И во однос на двата сета снимки, оние од 24 и 27 ноември, во возилото, како што посочи обвинителката, се наоѓаат три лица – на возачкото и на совозачкото седиште и еден на задните седишта.
„Од снимките не се гледа поврзаност со кривичното дело“
На презентираните снимки приговор вложи адвокатот Јовица Страшевски, кој му е бранител на првообвинетиот Љупчо Палевски-Палчо. Тој рече дека на ниту едно од возилата не можела да се види регистарската табличка, и покрај појаснувањето на обвинителката дека системот „Сејф сити“ ги пребарува возилата според регистарските таблички.
Страшевски наведе и дека од гледањето од приложените снимки денеска, не може да се види каква било поврзаност со кривичното дело што му се става на товар на неговиот клиент.
„Беше констатирано дека возилото „ситроен“ било преместено од Триангла во Бутел, но не беше презентирано како дошле до тој заклучок. Во видеото со ‘ситроенот’ не беа покажани таблички. Невозможно е, ако ‘Сејф сити’ работи со пребарување по регистарски таблички, да нема на ниедна снимка да се види табличка од возилото. Сакам да приговарам и дека е чудно како на секој презентиран видеозапис судот го дополнуваше записникот, односно помагаше во објаснување на видеозаписите. Освен во последните две видеа, каде што се гледаат таблиците на ‘рено кангу’, друго не покажа. Нема доказ дека тоа возило е поврзано со исчезнувањето на Вања. Само презентираше движења на возила низ одредени улици. Ни за ‘ситроенот’, ни за ‘кангуто’ не се докажа дека имало движење кон зградата на Вања“,
рече Страшевски.
Ова тој го повтори и во изјава за медиумите по завршувањето на рочиштето:
„За вакво сериозно обвинение што се поднесува, еве, можам конкретно да кажам за мојот штитеник Љупчо Палевски, Обвинителството треба да има докази. Денеска четири часа изгубивме за да гледаме како количиња се шетаат низ Скопје во магла и да ни објаснуваат како се движат по скопските улици. Сами видовте дека немаат преземено елемент на дејствие кое е предмет на кривично дело“,
изјави адвокатот.
По гледањето на снимките приговараше и неговиот клиент Палевски, но за други сегменти од листата на докази. Конкретно, тој наведе дека од 197 докази, колку што има на листата, дел од нив се дуплираат.
Им порача на двете обвинителки кои беа во судницата да си ја средат листата на докази.
„Имаат листа од 197 докази, на кои судот парцијално обрнува внимание и не забележува дека има дуплирани докази… Ова се сериозни пропусти. Обвинителството треба да си ја среди листата на докази“,
рече Палевски.
Тој најави дека на следното рочиште ќе поднесе барање за изземање на, како што рече, целото Основно јавно обвинителство Скопје.
Претходно, одбраната на Палевски реагираше и на тоа што наводно една од обвинителките, Ана Стојковиќ-Димитровска, наводно, немала полномошно за застапување на предметот.
На овие тврдења таа одговори дека такво нешто не е потребно и оти секој обвинител од Основното јавно обвинителство Скопје може да го застапува обвинителниот акт.
Судијата Стефановски останува да го води предметот
Инаку, денешното рочиште почна со тоа дека е одбиено барањето на Љупчо Палевски-Палчо за изземање на претседателот на судечкиот совет Ивица Стефановски, кој го води судскиот процес за грабнувањата и убиствата на Вања Ѓорчевска и велешанецот Панче Жежовски.
Ова го соопшти судијата Стефановски читајќи го решението на претседателот на Основниот кривичен суд Скопје, Иван Џолев.
Палевски, пред крајот на минатото рочиште на 20 декември лани, побара изземање на судијата Стефановски бидејќи, како што кажа, одбивал да даде наредба до СВР Велес за прибирање докази кои ѝ се потребни на одбраната на првообвинетиот за постапката.
Одлуката за неизземање на судијата, претседателот на Кривичен ја донел на 25 декември. Инаку, доколку беше прифатено барањето за изземање на судијата Стефановски, судскиот процес ќе требаше да започне од почеток.
Еден од клучните сведоци Гоце Трајковски, кој со таткото на Вања, Александар Ѓорчевски, воделе паралелна истрага по исчезнувањето на девојчето, и понатаму останува недостапен за органите на прогонот. Тој, како што информира судијата, не бил пронајден на неговата адреса од страна на полицијата.
Надоврзувајќи се на ваквата околност, обвинителката Жаклна Крстевска-Јосифовска, која го застапува обвинението, рече дека останува на ставот Трајковски да биде испитан пред судот и засега да не се чита неговата изјава дадена во Обвинителството во текот на истрагата.
„По однос на сведокот Гоце Трајковски, Обвинителството не го повлекува предлогот за негово испитување, бидејќи постои можност до крајот на постапката да стане достапен и да биде испитан за околности кои се значајни за оваа постапка”,
рече обвинителката.
Следното рочиште судијата Стефановски го закажа за една недела, односно на 27 ноември.
На обвинителната клупа се Љупчо Палевски-Палчо, Влатко Кешичов, Боре Видевски, Велибор Манев, како и таткото на девојчето, Александар Ѓорчевски.
На првото рочиште на 20 септември, кога и формално стартуваше судскиот процес, сите обвинети се произнесоа дека не се чувствуваат за виновни.
Според обвинението, тие заедно ги испланирале грабнувањето на 14-годишното девојче со цел да присилат член на нејзиното потесно семејство да даде парични средства за откуп и грабнувањето на Жежовски со намера да го присилат да им го даде сопственото возило „ситроен“ за да го користат за грабнување на детето во Скопје.
Малолетната Вања и велешанецот Панче, кои беа пријавени за исчезнати на 27 и 24 ноември 2023 година, беа пронајдени мртви во близина на Скопје и Велес неколку дена подоцна, односно на 3 декември 2023 година.
Во врска со овој случај е осомничено уште едно лице за помагање по извршување на кривичното дело, против кое постапката ќе се води одвоено.