„На Универзитетската клиника за токсикологија новогодишната ноќ помина прилично мирно. Прегледани се вкупно 21 пациент од кои 18 како акутни труења со алкохол. Од тие 18 четири се женски, а 14 машки. Кај женските најмладата пациентка е 17, а најстарата 26, а кај машките најмладиот е 14, а кајстариот 38 години“, изјави д-р Андон Чибишев
На новогодишната ноќ со акутно труење од алкохол на Клиниката за токсикологија во Скопје биле примени 18 пациенти. Најмладиот имал 14 години, а најстариот 38. Тринаесетгодишно дете се здобило со тешки повреди на раката од петарда и ќе има траен инвалидитет, информираа денеска на прес-конференција, директори на здравствени институции во Скопје.
Нивната генерална оценка е дека ноќта поминала прилично мирно со помал обем на работа.
„На Универзитетската клиника за токсикологија новогодишната ноќ помина прилично мирно. Прегледани се вкупно 21 пациент од кои 18 како акутни труења со алкохол. Од тие 18 четири се женски, а 14 машки. Кај женските најмладата пациентка е 17, а најстарата 26, а кај машките најмладиот е 14, а кајстариот 38 години. Вообичаено како секоја година имаме помалку пациенти од минатата година“,
изјави Чибишев.
Еден од пациентите измешал алкохол и таблети. Акутното труење е индивидуално и, како што појасни Чибишев, може да се случи и со две чаши алкохол.
„Труењата со алкохол до 25 години се животозагрозувачи состојби и треба многу да се внимава, тоа е едниот проблем, а другиот е што има пациенти што тоа го зачинуват со медикаменти што е уште поопасна состојба која може да предизвика сериозни нарушувања на здравјето. За среќа ниту еден пациент не е задржан после примената терапија и сите се пуштени на домашно лекување со совет како да се однесуваат во наредните денови“,
изјави Чибишев.
Дежурството на новогодишната ноќ во Универзитетската клиника за хируршки болести „Св. Наум Охридски“, според директорт Небојша Настов, поминало мирно, со вообичаен број на итни пациенти како во нормалните денови. Вкупно биле прегледани 81 пациент, пет како последица на сообраќајни несреќи, тројца од физички пресметки и биле извршени три оперативни интервенции.
„За среќа во текот на новогодишната ноќ немаше повреди од петарди и огнострелно оружје, тоа беше зачестено во период пред празниците. Во последниот месец имаше 50-ина претежно малолетници на возраст од 12 до 17 години“,
рече Настов кој нагласи дека најверојатно се користат се поголеми петарди со поголемо барутно полнење кои оставаат трајно оштетување кај децата.
На ТОАРИЛУЦ, Ургентниот центар, КАРИЛ и Ортопедија, како што информираше доктор Игор Мерџановски, имало помалку работа за 30 проценти од претходните години.
„Направени се 35 прегледи од кои кај девет лица од сообраќајки со лесни телесни повреди и тие пациенти се пуштени на домашно лекување. Имаме двајца пациенти од физички напад, едниот е задржан на опсервација и во текот на денов ќе биде пуштен дома, како и 13-годишно дете со тешка повреда на раката од петарда, кое веќе е оперирано на Детската клиника за хирургија и најверојатно ќе биде со инвалидитет на раката. Примен е и еден странски државјанин во алкохолизирана состојба со повреда на носот и главата, згрижен е и пуштен е на домашно лекување“,
изјави Мерџановски.