fbpx
Свет

(ВИДЕО) Земјотрес со јачина од 7,4 степени регистриран во Вануату, урнати се згради, а има и жртви

360степени | 17 декември, 2024 08:12

Според податоците на Американскиот геолошки институт (USGS), два часа по овој земјотрес имало уште најмалку четири последователни потреси околу Порт Вила – со магнитуди од 4,7 до 5,5 степени

Земјотрес со јачина од 7,4 степени според Рихтеровата скала е регистриран во островската држава Вануату, во јужниот дел на Тихиот Океан, соопшти Европскиот медитерански сеизмолошки центар (ЕМСЦ).

Земјотресот се случил во 12:47 часот по локално време.

Епицентарот на земјотресот бил недалеку од Порт Вила, главниот град на Вануату на длабочина од 28 километри.

По земјотресот веднаш било издадено предупредување за цунами, но два часа подоцна било повлечено со образложение оти заканата поминала.

Направена е голема материјална штета, вклучително и на објект во главниот град Порт Вила, во кој се наоѓа американската амбасада, заедно со оние на Велика Британија, Франција и Нов Зеланд.

Американските власти објавија дека зградата претрпела значителна штета и дека ќе биде затворена до понатамошно известување.

Од снимките објавени на социјалните мрежи може да се види дека од земјотресот има урнати згради, објекти со искршени прозорци, оштетени бетонски столбови, а нарушени се и телекомуникациските врски.

Според објава на Икс од Ден Мекгари, новинар кој живее во Порт Вила, има најмалку една жртва за која вели дека добил потврда од полицијата, а оти видел најмалку три повредени лица што чекале помош.

Според податоците на Американскиот геолошки институт (USGS), два часа по овој земјотрес имало уште најмалку четири последователни потреси околу Порт Вила – со магнитуди од 4,7 до 5,5 степени.

Властите во Нов Зеланд и Австралија соопштија дека нема закана од цунами за нивните земји. Австралија, исто така, нагласи дека е „подготвена да го поддржи Вануату додека се проценува обемот на штетата“.

Вануату се наоѓа во сеизмички активно подрачје каде има чести големи земјотреси и други природни катастрофи.

©2026 360 степени, Сите права се задржани