Ќе ги преземеме сите правни мерки против овие лажни обвинувања и ќе побараме одговорност од сите инволвирани во ширењето на овие дезинформации. Дополнително, ги повикуваме антиалбанската влада и институциите веднаш да престанат со оваа опасна реторика и да се посветат на праведно, непристрасно и професионално справување со настаните. Наместо да креираат вештачки виновници, нека се фокусираат на истрагата за сите учесници во инцидентите, без разлика на нивната етничка припадност или политичка заднина, велат од ДУИ
Демократската унија за интеграција најостро ги осудува лажните обвинувања и манипулациите што антиалбанската влада ги пласира на денешната прес-конференција, се наведува во реакцијата од ДУИ. Во соопштението испратено до медиумите, од ДУИ обвинуваат дека станува збор за обид да се вмеша нивната партија во настаните поврзани со Денот на албанското знаме, што, според нив, е невидена манипулација и обид да се покријат сопствените неуспеси и дискриминаторски политики на Владата.
„Јасно и недвосмислено изјавуваме: ДУИ нема никаква врска со организирање на инцидентите. Секоја изјава или обвинување во таа насока е целосно неосновано, клеветничко и злонамерно. Антиалбанската влада со ова јавно ги манипулира граѓаните, обидувајќи се да го изврти вниманието од вистинскиот проблем – селективниот пристап на полицијата, која уапси 17 Албанци за инциденти со државното знаме, но ниту еден од оние што го запалија албанското знаме“,
посочуваат од ДУИ.
Овие дејствија претставуваат провидна тактика за продлабочување на етничките тензии и дефокусирање од вистинските проблеми во земјата, потенцира ДУИ.
„ДУИ нема да дозволи да биде предмет на политички спинови и манипулации. Објавуваме дека ќе ги преземеме сите правни мерки против овие лажни обвинувања и ќе побараме одговорност од сите инволвирани во ширењето на овие дезинформации. Дополнително, ги повикуваме антиалбанската влада и институциите веднаш да престанат со оваа опасна реторика и да се посветат на праведно, непристрасно и професионално справување со настаните. Наместо да креираат вештачки виновници, нека се фокусираат на истрагата за сите учесници во инцидентите, без разлика на нивната етничка припадност или политичка позадина“,
се наведува во соопштението.
Претходно, од коалицијата „Вреди“ информираа дека обезбедиле фотографии кои докажуваат дека младите што го запалија државното знаме се блиски соработници на Артан Груби. Вицепремиерот за добро владеење Арбен Фетаи, од прес-конференција во партиското седиште, порача дека ДУИ за чисто лични интереси ги користи младите како „топовско месо“, само за да ја избегнат правдата што ги чека.
„На ДУИ не им се допадна што Албанците во овие празници слободно славеа од Куманово до Струга, од училишта до плоштади, од плоштади до културни домови, каде што сакаа слободно и финансиски поддржани од институциите во земјата, албанската песна и оро одекнуваше насекаде. Како што гарантиравме од почеток, тоа се случува и во иднина, сите инволвирани во инцидентите на празничната ноќ ќе ја добијат заслужената казна без разлика. Со ова темпо ќе ги демаскираме плановите на поранешната власт за дестабилизација на државата“,
кажа Фетаи.