Во писменото соопштение од ДУИ главно ја осудуваат полициската интервенција на настанот, за која оценија дека е без преседан. Го осудија и палењето на државното знаме – чин што го оквалификуваа како реакција на несоодветната полициска интервенција
По синоќешниот инцидент на прославата на Денот на албанското знаме во центарот на Скопје, кога граѓани го искинаа националното знаме, утринава со реакција се јави Демократската унија за интеграција (ДУИ).
Во писменото соопштение испратено до медиумите, од ДУИ главно ја осудуваат полициската интервенција на настанот, за која оценија дека е без преседан. Го осудија и палењето на државното знаме – чин што го оквалификуваа како реакција на несоодветната полициска интервенција.
„Оваа интервенција, наместо да го зачува јавниот ред, предизвика непотребни тензии и создаде клима на конфронтација, нарушувајќи го правото на граѓаните слободно да ја одбележат оваа значајна празнична традиција. Го осудуваме индивидуалниот чин на палење на државното знаме како реакција на несоодветната интервенција на полицијата. Таквите дела не ги одразуваат вредностите на Албанците ниту, пак, стремежите за стабилен соживот и заемна почит“,
пишуваат од ДУИ во писменото соопштение.
Од партијата на Али Ахмети оценија дека ВМРО-ДПМНЕ и други политички субјекти се обидуваат да ги злоупотребат инцидентите за да изградат лажна нарација која ги криминализира ставовите Албанците. Ваквата тенденција, како што велат, е напад на идентитетот и достоинството на Албанците и обид за прикривање на криминалните агенди на овие структури.
„Албанците во Северна Македонија постојано го покажуваат својот ангажман кон демократските вредности, еднаквоста и меѓуетничката соживот. Нема да дозволиме нашите легитимни ставови да се користат како параван за политички манипулации или за зачувување на позициите на тие што ги ставаат личните интереси над интересите на граѓаните и државата“,
се додава во соопштението на ДУИ.
Повикаа институциите да дејствуваат со зрелост, професионалност и непристрасност, обезбедувајќи слободно изразување на својот идентитет и култура.
„Ги повикуваме албанските граѓани, како и сите граѓани на Северна Македонија, да ги задржат смиреноста, достоинството и единството, и да не подлегнуваат на провокации и манипулации на оние што имаат цел да создадат поделби и дестабилизација“,
додаваат од ДУИ.