„Минимален износ по корисник до 10 милиони евра. Рок на отплата од страна на крајниот корисник до 15 години со вклучен грејс период до три години и квартална отплата по завршување на грејс периодот. Фиксна каматна стапка од 1,95 отсто без надомест за одобрување и управување. Сопствено учество на крајниот корисник од минимум 20 отсто од вкупната вредност на инвестицијата“, рече портпаролката на Владата за условите за унгарскиот кредит
Со одлука на Владата потврдени се условите за унгарскиот кредит, за што претходно беше постигнат договор со банките. Со тие средства се очекува да се придвижи стопанството. Ова денеска на прес-конференција го рече портпаролката на Владата, Марија Митева, посочувајќи дека најголемиот дел од банките се согласни да ги исплатат парите од унгарскиот кредит за компаниите.
„На седница на Влада одржана на 26 ноември 2024 година се донесе заклучок во врска со предлогот на Министерството за финансии за условите за кредитната линија од унгарскиот кредит, а во однос на користење на средствата од кредитната линија за инвестиции и развој на приватни трговски друштва“,
рече Митева.
Според неа, Владата го задолжи Министерството за финансии во соработка со Развојната банка да преземат активности околу операционализација на средствата од кредитната линија под следните услови:
„Минимален износ по корисник до 10 милиони евра. Рок на отплата од страна на крајниот корисник до 15 години со вклучен грејс период до три години и квартална отплата по завршување на грејс периодот. Фиксна каматна стапка од 1,95 отсто без надомест за одобрување и управување. Сопствено учество на крајниот корисник од минимум 20 отсто од вкупната вредност на инвестицијата“.
Посочи дека средствата од кредитната линија за финансирање ќе бидат наменети за финансирање на дејноста производство и ќе можат да се користат за инвестиции во опрема, како машини и останато, недвижности, погони, фабрики, деловни објекти за сопствена употреба, транспортни средства поврзани со производствениот процес, обновливи извори на енергија наменети за производство на енергија и нематеријални средства, како што се инвестиции во развојот и софтвери.
Исплатата, како што рече портпаролката, ќе биде извршена врз основа на доставени фактури од крајниот корисник со цел да се обезбеди контрола на искористувањето на средствата.
Според неа, бруто-домашниот производ е проектиран на 16 милијарди, а ова се пет отсто од БДП, средства што се очекува да бидат инвестирани оваа и следната година.
На прашање кога ќе бидат достапни парите за фирмите, Митева рече дека прво Министерството за финансии треба да ги префрли парите на Развојната банка, а таа да склучи договор со банките и тие договори да поминат во рамки на надлежните органи во самите банки и потоа веднаш да бидат достапни.
На новинарско прашање кога ќе можат да бидат достапни парите за фирмите и од кога ќе можат тие да ги поднесуваат апликациите со бизнис-плановите во однос на унгарскиот кредит, таа рече дека се очекува тоа да биде наскоро, штом завршат процедурите во банките.