Според портпаролката Сабрина Синг, оружјето е модификација на руската интерконтинентална балистичка ракета „РС-26 Рубеж“ способна да носи нуклеарни боеви глави
Во Пентагон синоќа потврдија дека Русија лансирала експериментална балистичка ракета со среден дострел кон територијата на Украина и дека САД биле известени кратко време пред испалувањето на оружјето.
Според портпаролката Сабрина Синг, оружјето е модификација на руската интерконтинентална балистичка ракета „РС-26 Рубеж“ способна да носи нуклеарни боеви глави.
„Соединетите Американски Држави беа известени кратко време пред лансирањето преку каналите за намалување на нуклеарниот ризик. Ова е нов тип смртоносен капацитет ставен во употреба на бојното поле. Дефинитивно тоа предизвикува загриженост“,
изјави таа посочувајќи дека оваа ракета со среден дострел е способна да носи и конвенционални и нуклеарни боеви глави.
Според достапните информации, ракетата „Орешник“, како што кажа вчера во своето обраќања до јавноста рускиот претседател Владимир Путин, удрила на одбранбено-индустрискиот комплекс во градот Днипро.
Ракетата достигнала брзина до 10 маха, или 2,5-3 километри во секунда, наведува Радио Слободна Европа повикувајќи се на изјавата на рускиот лидер. Според Путин, оваа ракета не може да биде пресретната од современите средства за противвоздушна одбрана, вклучувајќи ги и системите создадени од САД и поставени во Европа.
Кремљ соопшти дека ова лансирање било одговор на нападите на украинските вооружени сили на 19 и 21 ноември врз цели во Брјанската и Курската Област, при што, како што се тврди, биле користени ракети од американско и европско производство, како што се АТАКМС и „Сторм шедоу“ (СКАЛП).
Претходно неделава претседателот на САД, Џо Бајден, ѝ даде дозвола на Украина да користи АТАКМС, најдолгоопсежните ракети што Вашингтон му ги испорача на Киев. Според експертите, користењето на овие американски ракети може да ѝ помогне на Украина да го заштити контролираниот дел од пограничната руска територија во Курската Област.