Мерките кои денеска ги промовираше СДСМ не се мерки за помош на граѓаните и погодените од економската криза, туку мерки за еднократен поткуп, реагираат од опозициската ВМРО-ДПМНЕ откако во Владата денеска беа претставени третиот пакет економски мерки.
„СДСМ мисли дека граѓаните може да ги излаже и да ги купи пред избори со несуштински мерки, кои не даваат резултати, и се само замачкување на очи. Дополнително денес Спасовски, Ангеловска и другите од владата го ставија стопанството на чекање до септември“,
велат од ВМРО-ДПМНЕ коментирајќи ги мерките.
Најтешкиот период од кризата, според нив, стопанството ќе треба да го преживее без помош, а со тоа се отвора ризик голем број на фирми да пропаднат.
„Владата целосно ги промаши временските рокови кога на државата, стопанството и граѓаните им требаа мерки, со што создаде ситуација во која обични мерки не помагаат воопшто. ВМРО-ДПМНЕ алармираше на време, но суетата и надменоста на власта беа преголеми“,
велат од опозицијата.
ВМРО-ДПМНЕ вели дека за разлика од власта, тие имаат стратегија која опфаќа силен инфраструктурен бум и засилен влез на странски инвестиции, како и воведување рамен данок кој ветуваат ќе го спуштат до 8 проценти во текот на нивниот мандат.