Пет објекти изгореа во тетовското село Вејце во пожар што ги зафатил попладнево, а за две лица интервенирала и брзата помош, бидејќи се задушувале од густиот чад. Едното лице е задржано во тетовската болница за понатамошен третман.
Пожарот избувнал во 15:30 часот попладнево во една од плевните во тешко пристапното шарпланинско село, но силниот ветер брзо го проширил и кон соседните објекти и биле зафатени уште три плевни и две семејни куќи. Интервенирале осум пожарникари-спасители од Тетово со три противпожарни возила.
„Пет објекти беа во пламен кога пристигнавме, дури и природата не беше на наша страна, дуваше силен ветер. Но, направивме натчовечки напори за да го ставиме пожарот под контрола, а сега е веќе целосно изгаснат. Среќа во оваа несреќа е што немаме човечки жртви, но материјалната штета е огромна“,
вели за „360 Степени“, Ука Алити, командир на противпожарната бригада во Тетово.
Тој додаде дека местото каде што се случил пожарот е тешко пристапно, но со добра стратегија успеале за релативно брзо време да стигнат до опожарените објекти.
„Вејце е најнепристапното село од сите села во Тетовско, но по повикот за пожар веднаш направивме стратегија како да пристапиме со возилата со цел брзо да го локализираме пожарот. Многу куќи се спасени од пожарот, бидејќи се речиси залепени една до друга“,
вели Алити.
