Министерот за локална самоуправа Златко Перински, во интервју за „360 степени“ на МРТ 1, кажа дека Општина Теарце прво пратила апликација без потпис и печат и тоа од приватен имеил. Потоа пратила апликација и по пошта, но рокот веќе бил пробиен
Општина Теарце е единствената од 81 единица на локалната самоуправа што не успеала да аплицира на јавниот повик на Министерството за локална самоуправа за распределба на сто милиони евра за инфраструктурни проекти за општините.
Како што рече министерот за локална самоуправа Златко Перински во интервју за „360 степени“ на МРТ 1, тие добиле имеил од приватно лице, а не од службена имеил-адреса на општината, во кој била прикачена апликацијата без печат и потпис на градоначалникот.
„Мене ми е навистина жал што несоодветно беше пратен апликативниот формулар. Ги консултиравме, бидејќи во наш интерес е сите општини да бидат активни. Не се дисквалификувани. Потоа, ни стигна апликативен формулар по пошта, но со датум од 14 септември. А требаше до 12 септември. Го разговаравме ова на координативното тело. Не се отфрлени ад хок, меѓутоа реално има пропусти во рокот. Немаме што тука да направиме“,
рече Перински.
Денеска изминува рокот во кој општините требаше да ги достават проектните документи до шесте ресорни министерства. Од утре почнува процесот на евалуација на предлог-проектите кој треба да трае меѓу седум и десет дена.
Рокот за поднесување на апликативните формулари заврши на 12 септември, а следниот ден почнаа да течат десетте дена за доставување на проектите. Според информациите што министерот Перински ги соопшти на 13 септември, 80 општини поднеле 357 апликативни формулари. Одлуката на Владата за тоа кои проекти ќе бидат поддржани се очекува да биде донесена на почетокот на октомври.