Прашан зошто Владата се решила на два општи критериума, а не се одело со појасни, построги и поконкретни за да се објективизира процесот на селекција, министерот за локална самоуправа одговори дека целта е стоте милиони евра да се искористат во целост
Денеска изминува рокот во кој општините требаше да ги достават проектните документи за инфраструктурните проекти со кои аплицираа на јавниот повик на Министерството за локална самоуправа за распределба на сто милиони евра за оваа намена. Проектите се доставуваа до шест ресорни министерства – за култура и туризам, за транспорт, социјална политика, образование, животна средина и за спорт.
Министерот за локална самоуправа Златко Перински во интервју за „360 степени“ на МРТ 1 рече дека од утре почнува евалуацијата на проектите.
„Тој процес очекуваме да не трае подолго од седум до десет дена. Тоа значи дека кон средината на следната недела ние треба да имаме спремен извештај од ресорните министерства – кои проекти во нивниот ресор ќе се финансираат. Сакаме дел од овие средства колку што е можно побрзо да им ги направиме достапни на општините за да можат да ги ефектуираат и оваа година. Имаме општини каде зимата доаѓа многу побрзо од останатите“,
рече Перински.
Според министерот, ако извештаите бидат готови до средината на следната недела, веднаш ќе бидат ставени на владина седница за да се донесе конечна одлука.
Критериумите за селекција на проектите се сведени на два:
- Распределба на обезбедените финансиски средства според глава на жител од резидентното население во секоја општина согласно последниот попис во Република Северна Македонија;
- Комплетноста на потребната проектна документација со сите потребни дозволи и согласности, со реведирана предмет-пресметка не постара од 12 месеци.
На прашањето – зошто Владата се решила на два општи критериума, а не се одело со појасни, построги и поконкретни за да се објективизира процесот на селекција, Перински одговори дека целта е стоте милиони евра да се искористат во целост.
„Во минатото кога се случувале слични повици, бидејќи ваков немало, општините аплицирале во ресорните министерства и притоа ресорните министерства евалуирале согласно своите специфични критериуми. Согласно ревизорски извештај на Државниот завод за ревизија, се кажува дека во иднина Владата треба да размисли да унифицира критериуми што ќе важат подеднакво за сите општини без разлика во кое министерство ќе аплицираат. Зошто? Доколку една општина сака да добие одредени средства од, да речеме, Министерството за транспорт, треба нејзиното барање да го усогласи со спецификите на Транспорт. Доколку сака да добие реконструкција на училиште, треба спецификите да ги приспособи до критериумите на Министерството за образование. Затоа ние, за да не ја обременуваме ситуацијата, за да им дадеме поголема можност на општините на рамноправна основа да добијат дел од овие средства, одлучивме да одиме со овие два критериума што навистина не се ограничувачки и секоја општина може да аплицира“,
одговори Перински.
Тој вели дека првиот критерим е токму во насока на искористување на точната предвидена сума од сто милиони евра.
„Првиот критериум требаше да ѝ даде рамка на локалната самоуправа да знае, да биде спремна отприлика со колкав буџет може да располага. Така што градоначалниците и локалните самоуправи знаат колкав дел од, ајде да го наречеме, колачот им следува и во принцип и во тој обем и со такви проекти аплицираат. Никој не може точно до денар и до евро да погоди. Ќе има мали разлики и мали отстапувања во плус и во минус, но сето тоа ќе се изнивелира“,
вели Перински.
Прашан дали во овој процес ќе видиме донирани проекти, Перински рече дека такви случаи имало во минатото – одредени компании, користејќи ја финансиската немоќ на локалните самоуправи, донираат проекти и фаворизираат некоја фирма која во иднина треба да го реализира тој проект.
„Јас искрено се надевам дека нема да имаме таков случај и за да немаме такви случаи во иднина, Министерството за локална самоуправа преку УНДП како имплементатор, со поддршка на шведската влада, им се нуди на локалните самоуправи и на оние што не се во можност да финансираат проект, со наши средства да им испроектираме“,
рече тој.
Инаку, рокот за поднесување на проектната документација истекува денеска, по што ќе почне евалуацијата на предлозите во шесте ресорни министерства.
Општина Теарце е единствена од вкупно 81 единици на локалната самоуправа во државата која не успеала да аплицира. Прво, пратила апликација без потпис и печат и тоа од приватен мејл. Потоа, пратила апликација и по пошта, но рокот бил веќе пробиен.