Според анализите на епидемиологот од Кочани, добиени во разговор со децата на починатиот, пациентот бил пензионер, што живеел во куќа во селото Облешево. Во периодот на инкубација не патувал надвор од државата, ниту, пак, надвор од местото на живеење. Од семејството нема други лица со слични симптоми
Седумдесет и осумгодишен маж од општината Чешиново-Облешево на 16 септември починал по компликации од западнонилска треска, пишува во извештајот на Институтот за јавно здравје (ИЈЗ).
Ова годинава е четврт регистриран случај на западнонилска треска во земјава, вирус од кој луѓето најчесто се заразуваат по каснување од заразен комарец.
„Првиот случај годинава е импортиран и е регистриран во април кај жител од Општина Василево. И вториот случај е импортиран во јули кај жител на Кочани. Третиот случај е автохтон и потврден во август кај жител на Тетово“,
се вели во извештајот на ИЈЗ.
За четвртиот случај на западнонилска треска, од ИЈЗ информираат дека Одделот за заразни болести бил информиран на 12 септември годинава.
„Првите симптоми на пациентот почнале на 9 септември со намален апетит, малаксаност и покачена температура до 39 степени. Веќе следниот ден поради појава на вознемиреност, агресивност и губиток на свест пациентот од Кочани е пратен во болницата во Штип. Поради тешката состојба на пациентот и дијагностицираниот енцефалитис, истиот ден е препратен на Клиниката за инфективни болести во Скопје, каде е потврдено заболувањето западнонилска треска“,
пишува во извештајот.
Како што информираат од ИЈЗ, пациентот починал на Инфективната клиника на 16 септември, откако му била влошена состојбата и му била поставена кислородна маска.
Според извештајот на ИЈЗ, од анализите на епидемиологот од Кочани добиени во разговор со децата на починатиот од западнонилска треска, пациентот е пензионер, што живеел во куќа во селото Облешево.
„Во периодот на инкубација не патувал надвор од државата, ниту, пак надвор од местото на живеење. Од семејството нема други лица со слични симптоми“,
велат од ИЈЗ.
Во регионот на општина Кочани е забележано присуство на комарци, поради што се спроведени активности за прскање и дезинсекција.
Во општина Чешиново-Облешево и покрај планирана тендерска постапка, досега не се спроведени активности за дезинсекција.