Собранието со мнозинство пратенички гласови на предлог на премиерот Зоран Заев ги разреши министерот за финансии Драган Tевдовски, министерот без ресор Хазби Лика, како и Сухејл Фазлиу од позицијата министер за локална самоуправа. По ваквата одлука, министерството за финансии ќе го води премиерот, а исто така негов предлог e и нов министер за локална самоуправа да биде досегашниот пратеник Горан Милевски од ЛДП.
Најжестока дебата во Собранието предизвика најавата на премиерот Зоран Заев да се гласа за негово назначување и за министер за финансии. Сепак, откако Антикорупциската комисија утринава испрати мислење до Собранието дека функцијата премиер е неспојлива со функцијата министер, Заев го повлече предлогот. Иако не е избран од Собранието, премиерот ќе раководи со ресорот финансии, за што се повика на Уставот и на Законот за Влада. Опозицијата обвини дека државата влегува во режим.
„Од денеска Македонијa влегува во режим, се менува реалноста. Oд денеска претседателот на Владата, на политичка партија и за малку човек што раководи со министерството за финансии, доколку не реагираше Антикорупциска, ќе бидат сконцентрирани во една личност. Или немате доволно кадри кои ќе можат доволно да ги опслужат овие институции или човекот може да биде министер за сите министерства и сите тела што ги има во Република Македонија. Ние како опозиција будно ќе ги следиме случувањата“, рече координаторот на пратеничката група на ВМРО-ДПМНЕ Никола Мицевски.
Премиерот Заев, во ниту една од репликите не посочи јасно зошто предлага разрешување токму на овие министри. Од пратеникот од ВМРО-ДПМНЕ Антонио Милошоски доби коментар дека само во Белизе премиерот е и министер за финансии.
„За Белизе не знам од кај ви е познато, ама изгледа знаете вие. Законот за Влада го дозволува и ме обврзува на тоа да обезбедам целосна ефикасност на Владата. Премиерот може да влијае на политиките на сите министри. Јас не сум таму за да потпишувам, туку за да ги исполнам политиките за бенефит на граѓаните”, му возврати Заев на Милошоски.
На почетокот на денешната седница Собранието констатираше дека им престанувааат мандатите на министерот за земјоделство Љупчо Николовски, на министерот за животна средина Садула Дураку, на министерот за култура Асаф Адеми и на министерот без ресор Зоран Шапуриќ, откако претходно тие поднесоа оставки.
Собраниската седница продолжува утре. По изборот на новите министри, со министерството за земјоделство ќе раководи Трајан Димковски, кој беше шеф на кабинет на досегашниот министер Љупчо Николовски. Нов министер за култура ќе биде Хисни Исмаили од партијата Алтернатива, а со ресорот животна средина ќе раководи Насер Нуредини на покана од ДУИ.
*КОИ СЕ МИНИСТРИТЕ ВО НОВАТА ВЛАДА?
Смената на министри, ја разниша и владината коалиција. Денеска лидерот на НДП Весел Мемеди се повлече од пратеничката функција и најави неотповикливи оставки на сите функционери од неговата партија. Мемеди предупреди дека разрешувањето на Сухејл Фазлиу, единствениот министер од неговата партија, води кон целосно напуштање на НДП на владејачкото мнозинство.
*поврзана вест: НДП на Весел Мемеди ја напуштa власта