Претседателот на Владата, Зоран Заев, пред малку од Собраниската говорница изјави дека дал налог на неговиот кабинет да го повлече предлогот тој да биде нов министер за финансии.
Потегот следи откако Државната комисија за спречување на корупцијата испрати мислење до Претседателот на Собранието дека функцијата премиер е неспојлива со функцијата министер. Сепак, Заев ќе раководи со ресорот финансии иако нема да биде избран од Собранието, за што се повика на Уставот и на законите.
„Кога е отворена дилема и дебата, власта, премиерот и сите треба да ја слушаме и опозицијата и ДКСК… Така што, формализацијата ја тргаме од дневен ред и најавувам дека согласно овластувањата ќе раководам со Министерството за финансии до избор на министер, врз основа на членот 11 од Законот за влада. “
изјави Зоран Заев
Нов нема да се бира, стариот во ред за разрешување
Мислењето на ДКСК сепак не влијаеше на предлогот за разрешувањето на досегашниот министер за финансии, Драган Тевдовски. Тој останува на листата заедно со Љупчо Николовски, Хазби Лика, Садула Дураку, Зоран Шапуриќ и Сухејл Фазлиу.
Освен реакциите за смената на Тевдовски, се очекуваат последици и од очекуваното разрешувањето на Сухејл Фазлиу, кој беше министер за локална самоуправа. Лидерот на неготвата матична НДП кој е и потпретседател на Собранието, Весел Мемеди, вчера изјави дека размислуваат за напуштање на владината коалиција.