Харис и Трамп беа изедначени со 44 отсто во претходната анкета од 15 до 16 јули, а Трамп водеше со еден процентен поен во анкетата од 1 до 2 јули
Американската потпретседателка Камала Харис има тесно водство пред републиканецот Доналд Трамп во претседателската трка, покажува новата анкета на Ројтерс/Ипсос.
Харис води пред Трамп со 44 наспроти 42 отсто меѓу регистрираните гласачи во националната анкета спроведена во понеделникот и вторникот, што следи по Националната конвенција на Републиканците каде Трамп формално ја прифати номинацијата на неговата партија во четвртокот и најавата на Бајден во неделата дека ја напушта трката и ја поддржува кандидатурата на Камала Харис.
Харис и Трамп беа изедначени со 44 отсто во претходната анкета од 15 до 16 јули, а Трамп водеше со еден процентен поен во анкетата од 1 до 2 јули.
Во сите три анкети, разликата е во рамките на статистичка грешка од три процентни поени, но резултатите може да упатуваат на ограничен замав за демократите и на тоа дека Трамп можеби не го доби вообичаениот пораст на поддршката за неговата кандидатура по минатонеделната партиска конвенција во Милвоки.
Околу 56 отсто од регистрираните гласачи се согласиле со изјавата дека Харис (59) е „ментално остра и способна да се справи со предизвиците“, во споредба со 49 отсто кои го кажале истото за Трамп (78). Само 22 отсто од гласачите го оцениле Бајден на тој начин.
Бајден (81) ја заврши својата кандидатура за реизбор по дебатата со Трамп во која често пелтечеше и не успеа агресивно да ги оспори нападите на Трамп, кои вклучуваа невистини.
Околу 80 отсто од демократските гласачи рекле дека позитивно гледаат на Бајден, во споредба со 91 отсто кои го кажале истото за Харис. Три четвртини од демократските гласачи рекле дека се согласуваат со изјавата дека партијата и гласачите сега треба да застанат зад Харис, додека само една четвртина рекле дека повеќе кандидати треба да се натпреваруваат за номинација на партијата.