За да не удри во карпата со главата, инстинктивно ги ставил двете раце на главата и кога удрил, почувствувал силна болка. На Ренџов веднаш му помогнале колегите, по што бил транспортиран во штипската Клиничка болница
Директорот на Центарот за управување со кризи, Стојанче Ангелов, попладнево го посети командирот на ТППЕ-Штип, Благој Ренџов, кој синоќа при гаснење на пожарот на старата штипска депонија меѓу населбите Пребег и Мерите се здобил со скршеници на двете раце.
Како што информира Ренџов, по завршување на гаснењето на пожарот на планината Серта добиле дојава за пожар на старата депонија.
„Во еден период кога се расчисти чадот, видов дека е запалена сува трева и огнот оди кон борвата шума, и за да не ја зафати, пробав да се симнам низ долот, кој е со карпи и стрмен дел. Во еден момент со левата нога пропаднав во дупка и изгубив контрола, по што почнав да паѓам. При паѓањето наидов на карпа“,
изјави Ренџов.
За да не удри во карпата со главата, инстинктивно ги ставил двете раце на главата и кога удрил, почувствувал силна болка. На Ренџов веднаш му помогнале колегите, по што бил транспортиран во штипската Клиничка болница.
Директорот на ЦУК оцени дека командирот на ТППЕ-Штип, Ренџов, е херој бидејќи заедно со неговите колеги не дозволиле огнот да се прошири кон боровата шума, но и кон бачилото со 250 овци.
Во гаснењето на пожарите повреден и е пожарникарот Александар Маролов од ТППЕ-Штип, кој има скршеница на левата рака.
Изминатото деноноќие на територија на државата има вкупно 30 пожари на отворен простор, од кои 10 се уште активни, информира Центарот за управување со кризи (ЦУК).
Под контрола е ставен еден пожар на отворено во Македонски Брод, кај с. Дивеч и с. Слатина, каде што гори мешена шума, а 20 пожари се целосно изгаснати.
Претходните денови, како што велат од ЦУК, имало случаи кога изгаснати пожари повторно се разгорувале.
Покрај пожарникатите, во гасењето на пожарите ангажирани се и два „ертрактори“ на Дирекцијата за заштита и спасување, два хеликоптери на Министерството за внатрешни работи и 90 армиски припадници.