Претседателот на САД, Џо Бајден, доцна попладнево објави дека се повлекува од претседателската трка за следните избори „во интерес на мојата партија и земја“
Набргу потоа, изрази поддршка неговото место како претседателски кандидат на Демократската партија да го заземе Камала Харис, актуелната потпретседателка на САД
Американскиот претседател Џо Бајден, кој доцна попладневно објави дека се повлекува од трката за реизбор на функцијата, ја поддржа својата заменичка Камала Харис – да биде кандидат на Демократската партија за претседател на САД наместо него.
„Мојата прва одлука како кандидат на партијата за изборите во 2020 година беше да ја изберам Камала Харис за мој потпретседател. Тоа беше најдобрата одлука што сум ја донел. Денеска сакам да ја понудам мојата целосна поддршка за Камала да биде кандидат на нашата партија оваа година. Демократи – време е да се сплотиме и да го победиме Трамп. Ајде да го направиме тоа“,
напиша Џо Бајден на социјалната мрежа „Х“
ТВ станицата „Си-ен-ен“, од извори од Демократската партија, објави дека треба да се очекува и други ветерани на партијата да излезат јавно и да ја поддржат Камала Харис за кандидат за претседател.
Еден висок функционер на партијата брифирал дека Демократската партија „ќе го искористи овој момент за да се обедини“.
Друг ветеран на Демократската партија, кој „Си-ен-ен“ го претставува како близок на поренешната спикерка Ненси Пелоси, за телевизијата брифира дека избраните функционери од редовите на Демократите ќе застанат зад Харис. „Кој би се тркал против неа“, кажал неименуваниот извор.
Повлекувањето на Бајден доаѓа по повеќенеделен притисок од неговата партија да се откаже од претседателската трка поради се поочигледните здравствени и когнитивни проблеми. Тие притисоци добија на силина по првата дебата меѓу Џо Бајден и Доналд Трамп, на која актуелниот претседател на САД на периоди изгледаше крајно неубедливо.
Дел од републиканците веќе го повикуваат да се повлече и од претседателската функција и прашуваат – ако не бил способен да се трка за претседател, како е способен да ја извршува функцијата до крајот на смандат?
Неговиот главен противкандидат, Доналд Трамп, повлекувањето на Бајден го нарече заминување на убедливо најлошиот претседател во историјата на САД.