„Како малоброен народ сакаме да потврдиме дека она коешто за нас е важно е во овие денови во коишто овде ќе разговараме за важните прашања, да ги донесеме најзначајните одлуки, кои ќе ја моделираат иднината на човештвото во следните декади“, рече премиерот од Вашингтон
Како држава, подготвени сме да го дадеме својот придонес на сето она што претставува вредност. Тука сме заедно со нашите сојузници да ја потврдиме нашата посветеност како досега, така и во иднина дека ќе го промовираме мирот, стабилноста и владеењето на меѓународното право. Ова денеска го изјави премиерот Христијан Мицкоски на НАТО-самитот од Вашингтон, посочувајќи дека претставува посебна чест и задоволство да се биде во друштво на овие луѓе и, како што рече, заедно со нив да одбележат 75 години од постоењето на НАТО-алијансата, најголемата одбранбена алијанса во светската историја.
„Како малоброен народ сакаме да потврдиме дека она коешто за нас е важно е во овие денови во коишто овде ќе разговараме за важните прашања, да ги донесеме најзначајните одлики, кои ќе ја моделираат иднината на човештвото во следните декади“,
рече тој.
Според него, Македонија како држава има намера да продолжи на тој начин да функционира и, како што рече, да ги промовира вредностите.
„Како македонска влада сакаме да бидеме рамо до рамо со нашите сојузници и да го потврдиме слободарскиот дух на македонскиот народ и на македонските граѓани“,
вели премиерот од Вашингтон.
Потврди дека државата останува посветена на исполнување на обврските, како што кажа, на минимум два отсто од БДП да бидат инвестирани во модернизација на армијата, нешто за кое посочи дека е многу важно зашто, според него, само на тој начин ќе ги следиме современите текови и ќе ја следиме најголемата светска одбранбена алијанса што некогаш постоела.
Во Вашингтон денеска продолжи одржувањето на НАТО-самитот по повод 75-годишнината од формирањето на Алијансата. На вчерашното отворање на настанот се обрати американскиот претседател Џо Бајден кој, посакувајќи им добредојде на лидерите на земјите членки на Алијансата, порача оти Алијансата е посилна од кога било.
На настанот учествува и македонска делегација предводена од премиерот Христијан Мицкоски, а во чиј состав се и министрите за надворешни работи и надворешна трговија, одбрана и внатрешни работи – Тимчо Муцунски, Владо Мисајловски и Панче Тошковски. Во Вашингтон е и претседателот на Собранието, Африм Гаши, кој во пресрет на отворањето на самитот учествуваше на Парламентарниот самит на НАТО.
И покрај очекувањата за потенцијална средба на македонскиот и грчкиот премиер Христијан Мицкоски и Кирјакос Мицотакис на маргините на самитот, таа е сè понеизвесна. Портпаролот на грчката влада Павлос Маринакис пред два дена изјави дека не е предвидена, но е можна средба меѓу Мицкоски и Мицотакис.