Американската окружна судијка Марјелен Нореика во Вилмингтон, пресуди против барањето на Хантер Бајден да се отфрлат двете точки од обвинението за лажење за трошење нелегални наркотици при купување пиштол „колт кобра“ од 2018 година и третата точка за нелегално поседување на оружјето
Федералниот суд во Делавер одби да ги отфрли обвиненијата за нелегално набавување и поседување оружје против Хантер Бајден, еден од двата кривични случаи против синот на американскиот претседател Џо Бајден, кој е во екот на кампања за реизбор.
Американската окружна судијка Марјелен Нореика во Вилмингтон, пресуди против барањето на Хантер Бајден да се отфрлат двете точки од обвинението за лажење за трошење нелегални наркотици при купување пиштол „колт кобра“ од 2018 година и третата точка за нелегално поседување на оружјето.
Пресудата го отвора патот за судењето закажано да започне на 3 јуни во Вилмингтон.
Хантер Бајден се изјасни за невин.
Специјалниот обвинител Дејвид Вајс ги поднесе обвиненијата за нелегално оружје во септември.
Хантер Бајден е првото дете на актуелниот претседател кој е обвинет.
Доколку биде прогласен за виновен, се соочува со повеќе од 20 години затвор.
Адвокатите на Хантер Бајден тврдат дека обвиненијата за оружје треба да бидат отфрлени од повеќе причини, вклучително и дека законот според кој Хантер Бајден беше обвинет е веројатно неуставен откако Врховниот суд на САД ги прошири правата за оружје во пресудата од 2022 година која постави построги, нови критериуми за одредување на законитоста на ограничувањата на огненото оружје.
Адвокатскиот тим на Бајден, исто така, тврди дека Вајс не бил правилно назначен, дека Хантер Бајден бил селективно гонет и имал обврзувачки договор што го штител од гонење.
Бајден ја негира вината и во вториот случај
Хантер Бајден, исто така, се изјасни за невин за федералните даночни злосторства во посебен случај што го покрена Вајс во Калифорнија. Таму, доколку биде прогласен за виновен, се соочува со затворска казна до 17 години. Почетокот на тоа судење е закажан за 20 јуни.
Специјалното обвинителство го обвини Хантер Бајден дека не платил данок од 1,4 милиони долари во периодот од 2016 до 2019 година и дека потрошил милиони долари на дрога, услуги за придружба, егзотични автомобили и други скапи предмети.
Американскиот окружен судија Марк Скарси во Лос Анџелес на 1 април го одби барањето на Хантер Бајден да го отфрли обвинението за даночно затајување.