Министерството за внатрешни работи (МВР) извести дека денеска повторно, како пред десетина дена, некој лажно се претставувал во име на државната секретарка во МВР, Магдалена Несторовска, до одредени граѓани и фирми испраќал лажни покани во врска со наводна тековна истрага.
„Апелираме до граѓаните да не наседнуваат на ваквите измами, а Секторот за компјутерски криминал и дигитална форензика при МВР веќе презема соодветни мерки и активности за законско санкционирање на сторителот. Министерството за внатрешни работи не користи електронска пошта за испраќање на покани до граѓани во врска со спроведување на истраги, туку тие покани се испраќаат во хартиена форма, со соодветна процедура“,
велат од МВР.
Оттаму апелираат граѓаните да не отвораат прикачени документи во прилог на пораки што не доаѓаат од верификувани и за нив познати испраќачи и да не наседнуваат на измами од ваков тип. До фирмите, пак, МВР упатува порака да ги заштита компјутерите од потенцијален малициозен софтвер согласно нивните интерни процедури за сајбер безбедност.