Не е првпат кафулето „Фонтана“ да биде нечија цел. Во февруари 2019 година беа поставени две експлозивни направи кај објектот кој е на неколку нивоа, од кои едната експлодираше и предизвика материјална штета на околните дуќани
Неофицијално, се смета дека синоќешниот пожар е дел од пресметките на две криминални банди кои траат подолго време во Скопје и на неговите периферии
Во официјалното известување од МВР за пожарот во кој синоќа изгоре терасата од угостителскиот објект „Фонтана“ лоциран во Трговскиот центар „Мавровка во Скопје, нема информации за можната причина за настанување на пожарот.
„На 1.5.2020 година околу 1:50 часот во Скопје, на булевар ‘Гоце Делчев’ настанал пожар во угостителски објект ‘Фонтана’, сопственост на М.А. (34), при што целосно била опожарена терасата. Повредени лица нема. Од страна на Бригадата за противпожарна заштита пожарот е локализиран, а увид ќе се врши во текот на денот“,
велат од МВР.
Полициски извор за „360 степени“ вели дека МВР има првични индиции дека пожарот бил подметнат и ја истражува позадината на настанот. Неофицијално, се смета дека е дел од пресметките на две криминални банди кои траат подолго време во Скопје и на неговите периферии. Вештачењето се очекува да започне денеска попладне.
Не е првпат кафулето „Фонтана“ да биде нечија цел. Во февруари 2019 година беа поставени две експлозивни направи кај објектот кој е на неколку нивоа, од кои едната експлодираше и предизвика материјална штета на околните дуќани.
Инаку, дојавата за пожар била примена околу 1 часот и 50 минути по полноќ, а Противпожарната едница на Град Скопје интервенирала со 7 возила и 21 пожарникар.