Од американската амбасада за Телма ја потврдиле грешката и велат дека „имааат целосна доверба во доказите и собраните информации кои се побарани од нив, според американскиот закон, за да ја назначат Јанева на листата“
Ставањето на починатиот сопруг на поранешната шефица на Специјалното јавно обвинителство Катица Јанева, на „црната листа“, е административна грешка, одговориле од американската амбасада во Скопје за телевизија Телма.
Јанева и актуелниот градоначалник на општината Карпош и кандидат за претседател на државата, Стевчо Јакимовски, пред два дена се најдоа на американската „црна листа“. Оваа одлука е објавена на веб-страницата на американскиот Стејт департмент.
Стејт департментот на „црната листа“ ги стави и членовите на нивните потесни семејства, односно двата полнолетни сина на Јакимовски, Гоце Јакимовски и Дамјан Јакимовски, како и синот на Јанева, Лазар Јанев, кој е адвокат, и сопругот Венци Јанев, кој е починат.
Од американската амбасада за Телма ја потврдиле грешката и велат дека „имааат целосна доверба во доказите и собраните информации кои се побарани од нив, според американскиот закон, за да ја назначат Јанева на листата“.
„Тие податоци се внимателно проверени и овде и во Вашингтон за секој поединец што го вклучуваме на нашата листа. Стандардна практика е да се назначуваат членови на потесното семејство на оние за кои сметаме дека се вмешани во значителна корупција. Во овој случај, информациите за еден член на семејството не беа актуелни и се работи за административна грешка“,
се вели во одговорот од амбасадата.
Основа за ставање на Јанева на „црната листа“ на САД е тоа што за време на нејзиното шефување со поранешното СЈО била вмешана во коруптивни дела, како и користење на политичкото влијание и моќта за нејзина лична корист. Според објавата на американскиот Стејт департмент, за Јанева постојат веродостојни информации за тоа дека побарала и примила поткуп за да влијае на Обвинителството под нејзина надлежност.
За Јакимовски, пак, се наведува дека како градоначалник на Општина Карпош бил вмешан во коруптивни дела. Наведено е дека службената положба ја користел да влијае во урбаниот развој на Општината, во процесите за јавни набавки, со цел преку нив да прибави корист за себе и за своите соработници.