Министерството преку соопштение тврди дека нема приведени лица во Струмица, а Одделот за внатрешна контрола ќе го проверува однесувањето на полицајците
Во официјалното соопштение од МВР за синоќешната акција во Струмица во магацинот каде што волонтери пакувале пакети со храна од донациите на семејството Заеви, се наведува дека полицијата постапувала според план и задачи за непочитување на забраната за движење.
На улицата „Ѓорѓи Трајков“, биле затекнати 11 лица и пакети.
„Од страна на полицијата лицата се легитимирани по што е констатирано дека дел од лицата поседуваат дозволи за движење на вработен поради вршење сменска и ноќна работа издадени од Здружение за хуманитарни цели ’Сите заедно можеме‘, а дел од лицата поседуваат известување издадено од Општинскиот штаб за заштита и спасување при Општина Струмица на 10 април 2020 година. Со овластување на дежурниот јавен обвинител извршен е увид и одземи се дозволите и известувањата со цел проверка на веродостојноста на истите“,
пишува во соопштението од МВР.
Во врска со пакетите, пак, велат од Министерството, јавниот обвинител издал наредба полицијата да физички да ги обезбедува додека Здружението за хуманитарни цели „Сите заедно можеме“ да ја достави целокупната документација.
Од МВР тврдат и дека не биле приведени туку дека денеска три лица биле повикани на разговор во СВР Струмица, по што си заминале. Министерството, исто така, најавува дека Одделот за внатрешна контрола ќе проверува дали полицајците постапувале согласно процедурите.
За ова претходно, пак, лидерот на СДСМ, Зоран Заев, претходно објави дека волонтерите биле приведени и им се заканувале.