„За една помош, да, тоа го прават сите држави во светот, но да имаме два или три вида помош за една инвестиција, мислам дека би било спорно. Затоа многу внимателно треба да се гледаат тие предлози и тие барања од страна на стратешките инвеститори“, вели министерот за економија
Потребно е да се репреговара за некои делови од договорите со еден од трите стратешки инвестиции кои во моментов се во Собранието пред пратениците, изјави денеска министерот за економија Крешник Бектеши на прес-конференција одговарајќи на новинарско прашање.
„За една од нив имам сомневања дека треба да се репреговара, зашто како Министерство за економија не сме биле директно вклучени во преговорите. За двете други веќе имаме анализи од реномирани интернационални институции и нивните препораки се инкорпирирани во веќе постоечките законски решенија и предлог-договори кои се анекс на законските решенија. Затоа следната недела ќе бараме дополнително објаснување од тимот кој бил вклучен во преговорите и тоа што е прифатено од Комисијата која е формирана од Владата за една од инвестициите која е во собраниска процедура. Ако е потребно, ќе бараме да се вратат одредени решенија во Владина процедура, за да можат да се преговараат од почеток“,
рече Бектеши.
Министерот не сакаше да ја наведе компанијата и рече дека не би било фер од негова страна да наведе одредена компанија на прес-конференција.
Според него, таквите инвестиции кои веќе имаат еден вид државна помош, индиректно, било тоа да е фидинг-тарифи или договори за откуп на електрична енергија, веќе ја користат државната помош од страна на Владата и би било спорно да им се даде дупла државна помош.
„Претходно имавме механизми и мерки во вид на фидинг-тарифи со цена која беше утврдена за одреден период, а сега ги сменивме, со што дополнително дадовме можност за нашата државна компанија, во овој случај ЕСМ, да може да склучи и договори за откуп на електрична енергија согласно критериумите кои се во интерес на ЕСМ и согласно динамиката на производство на електрична енергија од страна на ЕСМ. И тоа за мене не е спорно бидејќи тоа е во рамки на преговорите кои генерално ги прави ЕСМ за своите потреби, кои го снабдуваат универзалниот снабдувач, а воедно и малите потрошувачи. За мене спорно би било и тоа што го слушаме и од експертите и од анализите кои ги правиме за лиценцирани рентабилни, профитабилни инвестиции да се дава директна државна помош од страна на Владата“,
вели Бектеши.
Вели дека не знае дали има ваков пример, не само во регионот, туку и во другите држави за една иста инвестиција да имаме два или три вида помош.
„За една помош, да, тоа го прават сите држави во светот, но да имаме два или три вида помош за една инвестиција мислам дека би било спорно. Затоа многу внимателно треба да се гледаат тие предлози и тие барања од страна на стратешките инвеститори“,
рече министерот.
Појасни дека Министерството за економија не го дала предлогот за стратешки инвестиции, туку го извршило само формалниот дел за да се стават на владина седница.
„Според медиумите, Министерството за економија го дало предлогот. Но, не е така. Во делот на Законот за стратешки инвестиции има формирано Комисија од одредени членови и Министерството за економија само го врши формалниот дел за да се прикачи на седница на Владата одреден предлог-договор или во случајов предлог-закон каде што анекс им е договорот кој вие сте го виделе и кој е веќе објавен. За некои од тие стратешки инвестиции јас лично, заедно со моите советници, мислам дека треба да бидат променети одредени работи или, пак, да се преговара со заинтересираните страни затоа што ние како Министерство за економија не сме биле директно вклучени во преговарањето“,
вели Бектеши.
На дневниот ред на 140. седница на Собранието се ставени предлог-законот за реализација на стратешкиот инвестициски проект „Митилионеос“, когенеративна постројка Скопје, по скратена постапка, предлог-законот за реализација на стратешкиот инвестициски проект „Соларен парк Стипион“ и договор за стратешки инвестициски проект „Соларен парк Стипион“, по скратена постапка, предлог-законот за реализација на стратешкиот инвестициски проект „Аим грин тек“, по скратена постапка и предлог-законот за реализација на стратешкиот инвестициски проект соларна електрична централа – Пехчево, по скратена постапка.
Здружението на инженери на Република Македонија (ИНРМ) пред почетокот на седницата достави допис и упати електронска порака до секој пратеник во Собранието поединечно, со кои бараат да не даваат поддршка на четирите, како што велат, штетни предлог-закони за реализација на стратешки енергетски инвестициски проекти зашто го нарушуваат енергетскиот суверенитет на државата.
Сепак, предлог-законите веќе го поминаа првиот филтер во Собранието со 58 гласа „за“ и 31 „против“ и ќе одат на расправа во матичните комисии за економски прашања и законодавно-правната, по што треба да се донесат по скратена постапка.