Дали овој случај е уште еден доказ дека македонските институции и служби се „пробиени” по многу линии со српски врски и дали преку вакви содржини некој се обидува да влијае врз јавноста и да ја зголеми недовербата на граѓаните во македонските институции, која и онака е голема
Јавноста е сведок на нов обид за обелоденување „информации“ за трагичното убиство на малата Вања и велешанецот Панче, кои по некоја вообичаена траекторија, најпрво стигнуваат до Белград, па оттаму се лиферуваат до македонската публика. Сега улогата на „гласник“ ја презема контроверзниот српски политичар Срѓан Ного.
Тој втор ден објавува фотографии на кои се гледа возилото со кое беше извршено грабнувањето. На првата, која вчера ја пушти на неговите профили на социјалните медиуми, се гледа возилото „ситроен“ на бензинска пумпа со две лица кои се на возачкото и на совозачкото седиште. На снимката нема датум, а според неговите претпоставки, со возилото управува Панче, што значи дека таа е направена во период пред тој да биде убиен, а неговиот „ситроен“ да се искористи за киднапирањето и убиството на Вања.
Втората фотографија, наводно од некоја безбедносна камера наспроти зградата во која живееше девојчето, според Ного, е направена истото утро кога Вања беше пречекана од киднаперите и однесена кон Бразда. Иако врз секоја фотографија со современа технологија може да се интервенира, исписот на неа покажува 27 ноември, 7:34 часот. Ного најавува дека утре на неговите канали на социјалните мрежи ќе ги објави сите снимки со кои располага како и детали за тоа кој и како го решил случајот со двојното убиство.
??? ЕКСКЛУЗИВНО објављујем снимак отмице Вање Ђорчевске од 27. новембра у 07.29.30 часова, као и све друге снимке отмичара које су забележиле камере. Такође ЕКСКЛУЗИВНО објављујем и снимак “отмице” Панча Жежовског, фризера из Велеса. Сазнаћете како је текла истрага и ко је у… https://t.co/yzaSp6tRDw pic.twitter.com/I3huL90i3v
— Срђан Ного (@srdjan_nogo) January 4, 2024
Доколку се работи за снимки и записи од истрагата, како е можно тие да стигнале „во рацете“ на овој српски политичар? Не е првпат, туку е честа појава, српски функционери или новинари да добиваат вакви материјали кои имаат за цел да ја шокираат македонската јавност. Особено за овој случај, за кој е евидентно дека под наслов „ексклузивно“, најголем дел од шпекулациите, полуинформациите и сомнежите поврзани со истрагата дојдоа и се уште доаѓаат од „медиуми“ кај северниот сосед.
Прашање кое отворено се поставува е дали овој случај е уште еден доказ дека македонските институции и служби се „пробиени” по многу линии со српски врски и дали преку вакви содржини некој се обидува да влијае врз јавноста и да ја зголеми недовербата на граѓаните во македонските институции, која и онака е голема.
Имајќи предвид дека Срѓан Ного е еден од екпсонентите на руските интереси на Балканот и голем симпатизер на претседателот на Русија, Владимир Путин, како и исклучително влијателен теоретичар на заговори, растат сомнежите дека и со овој случај зад сцена се игра игра.