Тука, во Тирана, додаде министерката, сакам да им се заблагодарам на албанските институции и служби кои ги запленија овие вредни дела, а крадците ги соочија со правдата
„Владата високо го цени и го вреднува овој историски чин на враќање на дваесет икони кои им припаѓаат на македонските цркви и манастири. Иконите ги очекува уште едно патување. Овој пат да се вратат онаму каде што припаѓаат и си тежат. Заедно си одиме дома.“
Ова денеска го порача министерката за култура Бисера Костадиновска-Стојчевска, на церемонијата во Тирана за свечено предавање на запленетите икони на македонската делегација.
„Во овој гест како израз на пријателство од страна на Владата на Република Албанија, премиерот Еди Рама и мојата колешка, министерката Елва Маргарити, не ја препознаваме само политичката порака за почитување на преземените обврски како држави. Многу повеќе ја препознаваме пораката за етичкиот и моралниот однос, како и вреднување на македонското заштитено културно богатство“,
рече Костадиновска-Стојчевска.
Тука, во Тирана, додаде, сакам да им се заблагодарам на албанските институции и служби кои ги запленија овие вредни дела, а крадците ги соочија со правдата.
„На стручните лица од областа на заштитата, и од наша и од албанска страна, им благодарам за професионалниот пристап, кој во голема мера придонесе за овој успешен епилог на десетгодишното патешествие на македонските икони“,
посочи Костадиновска-Стојчевска.
Албанската министерка за култура, Елва Маргарити, посочи дека ова е свечен момент кој нѐ направи да се чувствуваме горди бидејќи, како што рече таа, овој чин нѐ става во авангардата за спроведување на меѓународните конвенции.
„Но, од друга страна, овој чин го отвора патот не само за враќање на другите предмети во нивните земји на потекло, ако сакате да имате претензии и ќе бидете идентификувани како такви, но од друга страна враќање и во Албанија на изгубени предмети, ограбени во нашите институции за културно наследство, музеи, паркови или култни објекти“,
додаде таа.
Незаконски одземените икони од македонските цркви случајно ги забележале нашите експерти вo 2013 година на прилог со премиерот Еди Рама на албанска телевизија.
По завршувањето на овој процес за враќање на 20-те украдени икони во земјава, предвидено е отворање нов процес за враќање на уште еден контингент идентификувани икони во Албанија.