Москва: Лавров и Блинкен нема да имаат средба во Скопје

„Вашингтон не побара средба и нема да има“, изјави рускиот заменик-министер за надворешни работи Сергеј Рјабков

Шефот на руската дипломатија Сергеј Лавров нема да има средба со американскиот државен секретар Ентони Блинкен на маргините на претстојниот Министерски совет на ОБСЕ во Скопје. Ова го изјави рускиот заменик-министер за надворешни работи Сергеј Рјабков, пренесе Радио Слободна Европа.

„Вашингтон не побара средба и нема да има“,

рече Рјабков.

Претходно, американскиот помошник секретар за европски и евроазиски прашања Џејмс О’Брајан потврди дека Блинкен ќе ја предводи делегацијата на САД на собирот на ОБСЕ во Скопје, но прашан за можна средба помеѓу Блинкен и Лавров, тој рече:

„Не знам какви се плановите на министерот Лавров за присуство во четврток. Затоа, нема да коментирам за тоа или за изгледите дека треба да се случи каква било средба.“

Шефот на руската дипломатија Сергеј Лавров вчера изјави дека руската делегација ќе учествува на Министерскиот совет на ОБСЕ во Скопје доколку Бугарија го отвори својот воздушен простор за руските авиони. Додаде дека добиле неколку барања за средби, вклучително и од западни претставници не прецизирајќи кој побарал средби.

• Лавров: Ќе бидеме на состанокот на ОБСЕ во Скопје ако Бугарија дозволи прелет на руски авиони

Во меѓувреме, официјална Софија одлучи да го отвори воздушниот простор за авионот на рускиот министер.

• Бугарија дозволи прелет на рускиот државен авион, Лавров ќе може да слета во Скопје

Претходно, портпаролот за надворешна политика на ЕУ, Петер Стано, изјави дека планираното патување на Лавров во С Македонија на Министерскиот состанок на ОБСЕ нема да се смета за кршење на европските санкции кои беа воведени по руската инвазија на Украина во 2022 година.