Ивана Атанасоска, претседателка на Асоцијацијата за цистична фиброза изјави дека следната година сите пациенти кои се над 12-годишна возраст ќе добијат соодветна терапија. Најави дека како асоцијација ќе се залагаат и за помалите деца затоа што, како што рече, превентивата е исто така многу важна, посебно кај нив бидејќи нема толку голем напредок во белодробната болест
Под мотото „Вдиши за ЦФ“ денеска Асоцијацијата за цистична фиброза организира прв настан по повод Европскиот ден за ширење на свесноста за цистична фиброза.
„Ова е прв настан од отворен тип за да можат да се приклучат сите оние кои сакаат да ја дадат поддршката. Поминавме одличен ден, од Средно Водно се качувавме до врв на Водно и потоа имавме музичка програма и благодарници за медиуми и спонзори кои го овозможија овој настан“,
изјави Ивана Атанасоска, претседателка на Асоцијацијата за цистична фиброза.
Таа рече дека целта е луѓето да разберат за болеста и соодветно да се информираат.
„Луѓето да се запознаваат дека во нивната околина постојат пациенти со ретка болест која се вика цистична фиброза. Да не го загрозуваат нивното здравје доколку свесно знаат дека се настинати бидејќи тоа е навистина штетно и за дечињата и за возрасните со ЦФ“,
појасни Атанасоска.
Таа истакна дека модулаторна терапија треба да биде достапна за сите пациенти и додаде дека лекот не е комодитет, туку е приоритет. Со помош на модулаторите комплетно се менува животот на пациентите.
Атанасоска изјави дека следната година сите пациенти кои се над 12-годишна возраст ќе добијат соодветна терапија. Најави дека како асоцијација ќе се залагаат и за помалите деца затоа што, како што рече, превентивата е исто така многу важна, посебно кај нив бидејќи нема толку голем напредок во белодробната болест.
„Сакаме да се изедначиме и со соседството и со другите европски земји, каде во моментов се дава терапија над шест години. И во моментов е во процес можноста да се префрли терапијата да се дава од две години нагоре, како што е во САД и во Канада“,
појасни Атанасоска.