Според вицепремиерката, неопходни се и измени со кои веднаш би дошло до прекинување на мандатот на функционер кој е на позиција, а чие име ќе се најде на „црните листи“
Вицепремиерката за добро владеење Славица Грковска вечерва во интервју за ТВ Сител изјави дека до Владата покренала иницијатива за законски измени според кои, на лицата кои се на листите на санции на САД, Европската Унија и Обединетите нации, би им се оневозможило да бидат носители на функции во земјава.
Според Грковска, неопходни се и измени со кои веднаш би дошло до прекинување на мандатот на функционер кој е на позиција, а чие име ќе се најде на „црните листи“.
„Паралелно со зајакнување на критериумите за носителите на функциите, кабинетот за политики за добро владеење подготви предлог за измени и дополнувања на Законот за рестриктивни мерки, со кој, покрај правно обврзувачките резолуции на Советот за безбедност на ОН и правните акти на ЕУ, ќе се додадат и мерките на САД, како основ за законски рестриктивни мерки“,
изјави вицепремиерката за добро владеење.
Однесувањето како ништо да не се случило по изрекувањето на таквите санкции, вели Грковска, ја урива довербата во институциите и не придонесува кон градење на систем во којшто граѓаните можат да имаат доверба.
Додава оти корупцијата во државата ќе се намали драстично во оној момент кога системот ќе функционира непристрасно, без разлика дали се работи за функционер или за обичен граѓанин, и кога ќе се санкционираат сите оние кои прекршиле дури и етички и морални норми.
На „црната листа“ на САД од минатата недела се најдоа и Сергеј Самсоненко, неговата сопруга Ирина и Ратка Куновска Камчева, мајката на Јордан Орце Камчев, каде што им се придружија на бизнисменот Јордан Орце Камчев, на актуелниот градоначалник на Струга, Рамиз Мерко, експремиерот Никола Груевски и поранешниот директор на УБК, Сашо Мијалков.
Еден ден подоцна министерот за внатрешни работи Оливер Спасовски изјави дека треба да се донесе законско решени со кое фирмите кои се или ќе се најдат на американската „црна листа“ да не можат да учествуваат на тендери објавени од државни институции во земјава.