Она што ние го зборуваме во Данска се Копенхашките критериуми, и на тоа се фокусираме, како и прашањето за уставните промени потребни за да се започнат преговорите, вели Бигум
Данска ѝ дава поддршка на Северна Македонија на патот кон Европската Унија, сакаме земјата да се придружи кон ЕУ и тука сме да помогнеме на секој чекор од патот, вели пратеничката од данскиот Фолкетингет, Марианне Бигум, која заедно со неколкумина други пратеници беше во Скопје на средби во Собранието, со други официјални претставници и чинители од граѓанското општество.
„Ние сме тука да подадеме рака и да разговараме за тоа како можеме да ѝ помогнеме на Македонија да стане членка на Европската Унија. Тоа е единствената точка на нашата агенда, односно како можеме да помогнеме и да го олесниме овој процес“,
вели Бигум во интервју за МИА.
Бигум вели дека она што го слушнала овде е дека постои општ консензус оти иднината на земјата е во ЕУ, а тоа, како што вели, е исто така став и на данскиот Парламент.
„Темата за членството на Македонија во ЕУ е високо на нашата политичка агенда и тоа е нешто на што работиме и зборуваме веќе долго време. Слушнав дека некои луѓе имаат сомнежи околу тоа дали навистина сакаме Македонија да биде дел од ЕУ, но тоа никогаш не сум го слушнала во данскиот Парламент и дискусиите што сме ги имале таму. Она што го дискутираме е како да го олесниме процесот, како да ја поддржиме Македонија во потребните измени со цел да се отворат преговорите, околу институционалните реформи. Тука сме да кажеме дека сме дојдени како пријатели и дека едвај чекаме Македонија да стане дел од ЕУ, и дека сме тука да ве поддржиме во секој чекор од тој пат“,
додава Бигум.
Во однос на евроинтеграциите, Бигум вели дека тие засега се фокусирани кон исполнување на Копенхашките критериуми.
„Она што ние го зборуваме во Данска се Копенхашките критериуми, и на тоа се фокусираме, како и прашањето за уставните промени потребни за да се започнат преговорите. Немаме разговарано за потребата од институционални реформи во ЕУ, или нови недоречености во законите, или други нови нешта. Значи ова не е на нашата агенда, и единствената цел на Парламентот и на делегатите на оваа посета е како да ѝ помогнеме на Македонија да стане дел од ЕУ“,
вели Бигум одговарајќи на прашањето дали планираните реформи во ЕУ ќе може да им помогнат на земјите како Северна Македонија да пристапат во Унијата.
Бигум додава дека жали што е ова толку долг процес и затоа ја разбира фрустрацијата, но сепак, како што вели, „јасна е пораката дека сакаме да ни се придружите и тука сме да ви помогнеме на секој чекор од патот, и работиме на тоа“.
„Навистина ми е жал дека ова е толку долг процес, се согласувам и ја разбирам фрустрацијата. И јас би се чувствувала исто. Ние сме посветени уште повеќе да се осигураме дека процесот се движи без проблеми, и затоа сме тука, од данскиот Парламент, во официјална посета на вашата земја“,
рече Бигум.