Претставката е поднесена од вработени во кумановскиот суд, а како што наведе денеска членката на Советот, Сузана Јошевска-Анастасовска, наводите во неа се однесуваат на повеќе работи – од мешање на претседателката во работите на судскиот амдминистратор, барање нацрт-план за годишните одмори и испитување на вработените за неговото користење, до надзор, контрола и психолошки притисок врз вработените и воведување двојна евиденција за присуство на работа. Ова кај вработените, како што наведе таа, создало страв и нарушување на работната атмосфера во кумановскиот суд
„Јас раководам со судот во целина и имам обврска истиот да функционира пред сè за добро и во корист на граѓаните. Сите вработени во судот мора (напишано со големи букви) да бидат целосно посветени и крајно ангажирани за извршување на своите работни задачи. Јас како судија и претседател на суд не прифаќам ништо помалку, ниту правам компромиси, точка“, наведе Јошевска-Анастасовска цитирајќи го делот од одговорот на претседателката на кумановскиот суд
Кон крајот на септември, Синдикатот на работниците од управата, правосудните органи и здруженијата на граѓани (УПОЗ), на прес-конференција пред Основниот суд Куманово обвини дека вработените во овој суд се жртви на притисок и малтретирање од претседателката Снежана Манев.
Претседателот на Синдикатот, Трпе Деаноски, пред медиумите кажа дел од навредите со кои, како што твреше тој се соочигвале вработените и побара реакција од надлежните институциите. Меѓу другите повикот беше упатен и до Судскиот совет, со барање ова тело да поведе постапка за претседателката на судот и да ја разреши. Во спротивно, доколку нема никаква разрешница од УПОЗ, се заканија дека ќе бидат принудени, доколку е потребно, да ја блокираат работата на Основниот суд, со штрајк.
Прес-конферецијата на Синдикатот беше на 22 септември. Точно две недели подоцна, претставката потпишана од 75 вработени во Судот денеска се најде на дневен ред на седницата на Судскиот совет. Прашањето што се отвори пред неговите членови беше дали да ја прифатат како основана или не.
На крајот, по обемната дискусија што се разви, мнозинството членови на Советот, конкретно осум од нив, гласаа за нејзино прифаќање, додека двајца беа против.
На расправата ѝ претходеше излагањето на членката на Советот, Сузана Јошевска-Анастасовска, како известител во предметот, која заедно со нејзината колешка Арлинда Кадри-Шахиновиќ биле во посета на кумановскиот Основен суд, каде што разговарале со дел од вработените потпишани на претставката, а добиле и одговори од претседателката на Судот во однос на случаите.
Конфликт меѓу претседателката и судскиот администратор
„Претставката е поднесена од вработени во Основен суд Куманово и во неа се наведува дека претставува продолжение на претходни нивни обраќања од декември 2025 и февруари и април 2026 година, а основниот навод е дека работната атмосфера во судот е сериозно нарушена поради начинот на раководење на претседателката на судот“,
наведе Јошевска-Анастасовска.
Реферирајќи, таа наведе дека наводите во неа се однесуваат на повеќе работи – од мешање на претседателката во работите на судскиот амдминистратор, барање нацрт-план за годишните одмори и испитување на вработените за неговото користење, потоа надзор, контрола и психолошки притисок врз вработените, до воведување двојна евиденција за приуство на работа. Ова кај вработените, како што наведе членката на Судскиот совет, создало страв и нарушување на работната атмосфера во кумановскиот суд.
Дополнително во претставката било наведено дека претседателката на судот употребувала навредливи и омаловажувачки изрази и јавни критики кон вработените, а тоа, како што додаде, се случувало и пред адвокати и странки во судот.
Причина за ваквата состојба во судот, која не е нова, подносителите на претставката сметаат дека е поради конфликтот меѓу претседателката и судскиот администратор.
Во рамките на работата по претставката, Јошевска-Анастасовска наведе и дека за време на посетата на Основниот суд Куманово таа со својата колешка провериле и дали сите 75 потпишани вработени стојат зад содржината на документот, имајќи предвид дека листовите со потписите кои стигнале во Судскиот совет биле во фотокопија.
Имено, предмет на интерес на Јошевска-Анастасовска и на нејзината колешка било дали потписите постојат во оригинал, дали се автентични и дали потписниците се запознаени со содржината на претставката.
Рече дека разговарале со 65 вработени, колку што биле присутни на 7 септември, кога била посетата. Од нив 15 самоиницијативно изјавиле дека лично искусиле дел од случаите наведени во претставката, додека други вработени рекле дека постајно слушаат викања, повисоки тонови во комуникацијата и оти чувствуваат притисок и лоша работна атмосфера во судот. Дел од нив кажале дека се согласуваат со начинот на кој се постапува со годишните одмори, оти се чувстуваат понижено поради определени начини на управувње и дека постои чувство на постојан надзор од страна на претседателката. Некои рекле оти контролата одела дотаму што биле под постојан видеонадзор.
„Кај дел од вработените кои пристапија беше забележан изразен страв од можни последици поради потпишување на претставката и сомневање дека додека траат овие мини интервјуа преку камера, се гледа кој доаѓа и кој влегува и поради тоа се уплашени“,
рече Јошевска-Анастасовска.
Претседателката не негира дел од наводите во претставката
Откако оцениле дека претставката е основана, таа и била дадена на одговор на претседарелката на Основниот суд Куманово. Инаку, за време на излагањето на известителката и во дискусијата што се разви потоа, во ниту еден момент претседателката на судот не беше спомената со име и со презиме.
Како што наведе Јошевска-Анастасовска, во одговорот што го добиле од претседателката, таа генерално земено, не го негирала она што дел од вработените го навеле во претставката. Таа барала да ѝ биде доставен списокот со вработените кои се потпишале да претставката, но Јошевска-Анастасовска рече оти одбила да го стори тоа заради заштита на подносителите.
Претседателката не го негирала постоењето конфликт со судскиот администратор и навела дека тоа е последица на неговото игнорирање и непостапување по дописите што му ги доставувала таа.
Пред да го сподели заклучокот дека претставката е основана оти документите покажуваат дека претседателката на судот ги преминала своите овластувања од Законот за судска служба и деловникот за работа на судот, таа ја прочита последната реченица од нејзиниот одговор на претставката.
„Јас раководам со судот во целина и имам обврска истиот да функционира пред сè за добро и во корист на граѓаните. Сите вработени во судот мора (напишано со големи букви) да бидат целосно посветени и крајно ангажирани за извршување на своите работни задачи. Јас како судија и претседател на суд не прифаќам ништо помалку, ниту правам компромиси, точка“,
наведе Јошевска-Анастасовска цитирајќи го делот од одгворот на претседателката на кумановскиот суд.
Членката на Советот, во таа насока наведе дека последниот навод дека претседателката на судот не прави компромиси „и точка“ значи дека работата е стигната дотаму што Судскиот совет треба да постапи поинаку кон овој проблем.
Николковски и Чачарова-Иливеска контра Јошевска Анастасовска
Со заклучокот на Јошевска-Анастасовска не се согласија нејзините колеги во Советот, Ивица Николовски и Тања Чачарова- Илиевска.
Николовски, иако рече дека станува збор за проблем кој не е нов и за него добиваат дописи изаминативе години, тој во еден дел од своето излагање се стави на страна на претседателката на кумановскиот суд, наведувајќи дека можеби поради недисцплината и самоволието на дел од вработените таа била принудена да преземе вакви чекори. Како проблем во повеќето судови тој ги наведе манипулациите со регистрирањето на работното време, одморите и боледувањата.
„Сакам да се навратите, не година по година, наназад со години, овој суд, како и секој суд, располага со ограничени ресурси, но е константно ажурен суд за разлика од други судови; и втора претпоставка, најмал број претставки на граѓаните за работата на судот и судиите има во овој суд. Тоа јас можам да ви го потврдам, а и вие можете ова да го проверите. Видете го досието за овој суд генерално и ќе видите дека ова е така. Дали претседателот треба да дозволи вработените да не одат на работа и да се куцаат вештачки преку лица со картички, во услови кога било побарано од судскиот администратор да преземе мерки. Кога видела дека нема резултати, си вовела тетратка. Кому смета тетратката? На неработниците. Дали претседателот има право? Па, има право. Нема да штитам ниту еден претседател на суд, но да посегнам по претседател на суд врз основа на голи наводи, и вашите наводи изнесени денеска, колешке, не ги признавам затоа што и тука ние излеговме од нашата конзистентност“,
рече Николовски.
Неговата колешка Тања Чачарова-Илиевска, пак, беше против за претстваката да се расправа како за претставка бидејќи, според неа, станува збор за поплака, по која се постапува на друг начин.
„Јас сум дел од работната група што беше во посета на судот, извештајот сè уште не e ставен, но е направен и во него стојат истите фрази – ни се обраќа на висок тон и нè навредува. Но неспорна е и нашата надлежност за одлучување по поплаки и претставки. Значи ова не е претставка која ние треба да ја расправаме вака на седница како претставка. Ова е поплака. Јас сум координатор на три суда, како сите овде имам постојано по неколку поплаки, но не ги сметам за претставки, и ќе се обидам во рамките на моите надлежности да ја расправам ситуацијата со претседателот во тој суд. Не може ние по поплаки да одлучуваме дали ќе разрешиме претседател без да утврдиме факти како работел во судот и дали се основани поплаките на вработените“,
кажа Чачарова-Илиевска.
Членката на Советот, Антоанета Димовска, пак, рече дека пред себе имаат огромен проблем кој не може да го стават под тепих. Рече оти знае дека има недисциплина кај некои судии и вработени во судовите, но, како што кажа, тоа се ретки случаи.
„Но, ако 75 луѓе велат дека не се чувстуваат добро, ако 75 луѓе доѓаат под стрес на работа, јас сметам дека тоа не е добро. Јас верувам во најдобрите намери на претседателката да се направи ред, ама и во тие најдобри намери може да се погреши. Јас верувам и во тоа дека судскиот администратор не наоѓа начин како да се справи, а негова задача е да ги распределува луѓето. Но факт е дека и таа нешто затаила. И сега ние треба да замолчиме на овие факти?“,
рече Димовска.
Бектовиќ: Состојбата е аларманта, а трае премногу време
Судијката Џенета Бектовиќ, како членка на Судскиот совет, го пофали излагањето на Јошевска-Анастасовска и рече оти го прифаќа нејзиниот предлог претстваката да биде прифатена како основана. Таа особено позитвно се осврна на одлуката на нејзината колешка да не ѝ го даде на претседателката на кумановскиот суд списокот со вработените потпишани на претставката.
Повикувајќи се на извештајот, таа рече дека состојбата со меѓучовечките односи во кумановскиот суд не само што е аларматна, итна и сериозна, туку трае и премногу време.
Таа дополнително се повика на извештај на Судскиот совет од посета на Основниот суд Куманово од 1 февруари 2023 година, во кој судии навеле дека претседателката се користела со навреди на национална основа.
„Од непосредниот разговор извршен со судиите од Основниот суд Куманово, а пред сè од писмените изјави доставени од одредени судии може да се заклучи дека во судот постојат нарушени меѓучовечки односи, некоректен однос на претседателот на судот кон одредени вработени, со користење на несоодветен вокабулар, навреди и омаловажувања пред други колеги, а кои во одредени случаи преминуваат и во навреди на национална основа, со зборовите, не би сакала да ги цитирам бидејќи се недолични, и не би сакала да ги наведувам. И на крај се вели дека може да се констатира и постоење на страв и несигурност кај судиите“,
рече Бектовиќ цитирајќи делови од овој извештај.
Инаку, судијката Снежана Манев за претседателка на Основниот суд Куманово беше избрана на 30 октомври 2023 година од страна на тогашниот состав на Судскиот совет. Та претходно ја извршуваше истата функција, но како вршител на должност.