„Јас разбирам дека дечињата повеќе можеби сакаат чипсови, смоки, бисквити, но еве им препорачувам дека една круша, едно јаболко, една банана се подеднакво здрава исхрана, но за тоа ќе треба да водат сметка и училиштата и општината за да им овозможат такво нешто“, изјави министерката за образование, коментирајќи го истражувањето со кое биле утврдени неправилности кај исхраната на учениците
Министерката за образование Весна Јаневска вели дека во рамки на истражување на МОН, УНИЦЕФ и неколку невладини организации се утврдени неправилности кај исхраната на учениците. Поради тоа, вели таа, ресорното министерство наскоро до сите училишта во земјата ќе достави препораки за исхрана на учениците.
„Утврдивме неправилности, па поради тоа ќе произлезат препораки кои училиштата ќе ги добијат за децата здраво да се хранат. Јас разбирам дека дечињата повеќе можеби сакаат чипсови, смоки, бисквити, но еве им препорачувам дека една круша, едно јаболко, една банана се подеднакво здрава исхрана, но за тоа ќе треба да водат сметка и училиштата и општината за да им овозможат такво нешто“,
изјави Јаневска за време на посета на две реконструирани училишни спортски сали во Штип и во Карбинци.
Во однос на тоа дека училиштето „Димитар Влахов“ во Штип, каде што денеска присуствуваше на пуштањето во употреба на реконструираната спортска сала, е прво училиште во Општината кое донесе одлука за забрана на мобилни телефони, министерката вели дека многу училишта во земјава веќе забраниле употреба на телефони.
„Во многу училишта пред час телефоните се ставаат настрана и тоа сметам дека е во ред, затоа што вниманието на децата треба да биде посветено на учењето, на наставникот, на книгата пред нив. Може да има исклучок, каде што децата ќе треба да ги употребат телефоните за да сработат некоја наставна тема. Но, тоа треба да биде строго контролирано од наставникот и после тоа тие да ги вратат таму каде што нема да им бидат достапни“,
изјави Јаневска.
Директорот на ООУ „Димитар Влахов“ Штип, Дејан Здравков, изјави дека ефектите од забраната за користење на телефоните, како и забрана за консумирање нездрава храна кај учениците се многу позитивни
„Добиваме повратни информации и од родителите, и од наставниците, и од самите деца. Подобрена е комуникацијата, физичката комуникација. Не одат веќе со наведени глави по ходниците и по училишниот двор. Тоа беше договорено во согласност на Советот на родители“,
вели Здравков.