Началникот е пренесен во струшката болница каде што му се констатирани тешки телесни повреди, а против напаѓачот ќе биде поднесена кривична пријава
Жител на струшкото село Велешта (44) е приведен по напад со нож на началникот на Полициската станица во Струга, јави дописничката на МИА.
Информацијата ја потврдиле и од СВР Охрид.
„Околу 19 часот во Струга од полициски службеници од ОВР Струга е лишен од слобода С. Н. (44) од струшкото село Велешта, затоа што денеска околу 17:30 часот на улицата ’Ристо Крле‘ во Струга со остар предмет го нападнал А. Д.(46) од Струга“,
изјави портпаролот на СВР Охрид, Стефан Димоски.
А. Д., според него, е пренесен во Општата болница во Струга каде што му се констатирани тешки телесни повреди.
Против напаѓачот, во координација со јавниот обвинител ќе биде поднесена соодветна кривична пријава, истакна Димоски.