Скопскиот регион, како што велат од ЕВН, како најголемо конзумно подрачје во изминатите 30 дена има вкупна потрошувачка од 148 399 мегават-часа електрична енергија или во просек по 4 787 мегават-часа дневно, а само вчера потрошувачката изнесувала 6 070 мегават-часа
Високите температури изминатите денови се причина за зголемена потрошувачка на електрична енергија. Вчерашниот ден, според, ЕВН Македонија, имал најголема потрошувачка на струја во земјава во изминатите 30 дена. Во периодот од 17 јуни до 17 јули вкупно се потрошени 405 028 мегават-часа електрична енергија.
„Најголема потрошувачка од 16 015 мегават-часа е регистрирана вчера, во еден од најтоплите денови во овој период со минимални 21 и максимални 38 Целзиусови степени измерени на скопскиот аеродром“,
велат од ЕВН Македонија за МИА.
Скопскиот регион, како што велат од ЕВН, како најголемо конзумно подрачје во изминатите 30 дена има вкупна потрошувачка од 148 399 мегават-часа електрична енергија или во просек по 4 787 мегават-часа дневно, а вчера потрошувачката изнесувала 6 070 мегават-часа.
Во однос на истиот период минатата година, од ЕВН велат дека вкупната потрошувачка на електрична енергија изнесувала 421 287 мегават-часа, а просечната дневна потрошувачка била 13 590 мегават-часа.
„Разликата во потрошувачката од лани до годинава се јавува заради разликата на температурите. Годинава во овој период имаме значително пониски температури во јуни и повисоки во јули во однос на истиот период лани“,
велат од ЕВН Македонија.
Високите температури се причина и за зголемена потрошувачка на вода, велат од скопското ЈП „Водовод и канализација“ од каде апелираат граѓаните рационално да ја користат водата.
„Особено апелираме да се избегнува непотребно трошење на водата за полевање на зеленило, бавчи и ниви, за перење автомобили, за полнење на базени, но и спречување на злоупотребата преку дивите приклучоци“,
велат од јавното комунално претпријатие.