Партиските интереси да не се ставаат над стратегиските интереси на државата, повторувајќи дека Преговарачката рамка која е усвоена од страна на земјите членки на ЕУ нема да се менува и таа претставува основа за процесот на преговори на Република Северна Македонија, како и дека нема нови барања и нови предуслови за отворање на преговарачките поглавја освен донесувањето на уставните измени, порачале меѓународните претставници
Гостите од Вајмарската тројка денеска се сретнаа со претседателот на Собранието Талат Џафери, пратеници и претставници на пратеничките групи на СДСМ, ВМРО-ДПМНЕ, ДУИ, Алијанса за Албанците, Алтернатива и БЕСА. На заедничкиот состанок, како што соопштија од службата за односи со јавност, Џафери ја поздравил оваа посета оценувајќи дека се случува во вистински момент и ја повторил посветеноста на земјава за остварувањето на стратегиските цели за членство во НАТО и во ЕУ.
Во тој контекст се зборувало и за уставните измени, каде што присутните изразиле различни гледишта.
„Соговорниците беа информирани за актуелните активности во Собранието во контекст на овие цели, особено за целосната усогласеност со позициите на надворешната и безбедносна политика на ЕУ и преземените чекори во однос на Украина, тековниот процес за скрининг по усвојување на Преговарачката рамка минатата година. Во поглед на процесот на уставни измени, кои се единствен предуслов за отворање на преговарачките поглавја, беше истакнато дека во моментов во Собранието нема потребно мнозинство за нивно спроведување“,
се наведува во соопштение од Собранието.
На средбата со меѓународните претставници преовладувала согласност за донесување на уставните измени, со исклучок на пратеничката група на ВМРО-ДПМНЕ и коалицијата. Истовремено била побарана и поголема поддршка и гаранции од европските партнери за процесот на преговори за спречување нови барања од страна на Република Бугарија.
Во име на пратеничката група на ВМРО-ДПМНЕ бил пратеникот Антонијо Милошоски, кој по средбата пренесе дека неговата партија го повторила ставот дека нема да ги поддржи уставните измени.
„Владејачкото мнозинство, според она што беше кажано на средбата со министрите, е сосема свесно дека нема две третини за да го испорача тоа што само, без национален консензус, лековерно го прифатило како обврска за наметнати уставни измени по барање од Бугарија. И второ, тоа што беше кажано од име на пратеничката група на ВМРО-ДПМНЕ и Коалицијата ‘За обнова на Македонија’, беше ‘да’ за ЕУ, но не за уцени од страна на Бугарија, кои не нудат никаква извесност дека процесот на евроинтеграции нема повторно и повторно да биде блокиран поради ирационални прашања кои Бугарија очигледно сè уште ги има кон Македонија“,
рече Милошоски.
Координаторот на пратеничката група на ДУИ, Арбер Адеми, кажа дека добиле јасни пораки од меѓународните претставници – да се стават на страна партиските интереси за доброто на државата. Според Адеми, прашањето дали има доволно пратеници кои би гласале за уставните измени е дневнополитичко прашање затоа што тој нема дилеми дека дел од пратениците од опозицијата ќе гласаат „за“.
„Сите пораки беа јасни, ако сакаме да ѝ се спротивставиме на Русија ќе гласаме ‘за’ уставните измени, тоа беше нивната порака. Само така ќе се отвори патот за членство на нашата земја во европското семејство и така ќе продолжи подобрувањето на општеството и државата на повеќе полиња поврзани со процесот на преговорите“,
рече Адеми.
Од Собранието соопштија и дека министерката Бун ја искажала поддршката која постои во Европската Унија за процесот на проширување и интересот за унапредување на интегративниот пат на земјите од целиот
регион во Унијата, што ќе придонесе за поголема стабилност и безбедност на европскиот континент.
Министерот Шинковски вел Сенк информирал за историското минато на трите земји, несогласувањата и проблемите со кои се соочувале во минатото, но и за единствената нивна поддршка на процесот на проширување и обединување. Ги потенцирал четирите приоритети на идното полско претседавање со Советот на ЕУ, меѓу кои ќе биде и процесот на проширување со конкретни активности.
Министерката Лирман нагласила дека во овој момент партиските интереси не треба да одат над стратегиските интереси на државата, повторувајќи дека преговарачката рамка која е усвоена од страна на земјите членки на ЕУ нема да се менува и таа претставува основа за процесот на преговори на Република Северна Македонија, како и дека нема нови барања и нови предуслови за отворање на преговарачките поглавја освен донесувањето на уставните измени.