Од правен аспект, пак, според адвокатот и член на Советот на Општина Струга, Ален Деребан, нема основа за поставување знаци дека движење во костим за капење е забрането, ниту за санкции за непочитување на забраната
Забраната за движење по костим за капење низ центарот на Струга, од Чаршискиот мост до Градскиот пазар, била донесена поради морални и етички причини и од почит кон бизнисот и граѓаните, информира Општина Струга.
Таквата одлука произлегла од редовните средби со Комисијата за превенција пред туристичката сезона на која се дискутира за повеќе теми.
Фото: фејсбук-профил на Општина Струга
„На една од средбите, покрај редовните точки, беше дискутирано и за темата за носење костими за капење на јавни места. Темата беше начната како последица на повеќе пријави од граѓани кои ја изразуваат својата загриженост за движењето по чаршијата и продавниците во центарот на градот по костими за капење. Заради морални и етички причини и почит кон бизнисите и граѓаните, кои тука се движат со своите семејства, преземавме мерки за предупредување при движењето по костими за капење“,
велат од Општина Струга за МИА.
Од правен аспект, пак, според адвокатот и член на Советот на Општина Струга, Ален Деребан, немало основа за поставување сообраќајни знаци, ниту за санкционирање.
„Советот носи годишни програми и во нив има предвидено на кои места како се уредува со сообраќаен знак. Во овој случај Советот нема донесено одлука за поставување на тие знаци. Нема ниту правна основа за нивно поставување ниту, пак, за санкционирање при непочитување“,
вели Деребан.
Општина Струга пред пет дена на официјалната фејсбук-страница објави дека се забранува шетање во костими за капење низ централното градско подрачје и ги замоли гостите и туристите да ги почитуваат правилата на доброто однесување и на јавниот ред со непокажување голотија на јавни места и простори.