„Њујорк тајмс“ се повикува на американски претставници запознаени со американското разузнавање за бунтот на Пригожин и наведува дека официјалните лица „се обидувале да откријат дали генералот Сергеј Суровикин, поранешниот врховен руски командант во Украина, помогнал во планирањето на акциите на Пригожин минатиот викенд“
Генералот Сергеј Суровикин, заменик-командантот на руските воени операции во Украина, знаел дека платеничкиот водач Евгениј Пригожин планира бунт против московското воено раководство, пишува „Њујорк Тајмс“.
„Њујорк тајмс“ се повикува на американски претставници запознаени со американското разузнавање за бунтот на Пригожин и наведува дека официјалните лица „се обидувале да откријат дали генералот Сергеј Суровикин, поранешниот врховен руски командант во Украина, помогнал во планирањето на акциите на Пригожин минатиот викенд“.
Пригожин во вторникот замина во егзил во Белорусија, според договорот со кој заврши кусиот бунт на борците на „Вагнер“ во текот на викендот, додека рускиот претседател Владимир Путин ги пофали вооружените сили за избегнување граѓанска војна.
„Њујорк тајмс“ објави дека американските власти, исто така, рекле дека има знаци дека други руски генерали можеби го поддржувале Пригожин. Ројтерс не можел независно да го потврди извештајот.
Пентагон сè уште не одговорил на барањето на Ројтерс за коментар. Кремљ и руското Министерство за одбрана, исто така, не одговориле на прашањата на Ројтерс.
Суровкин, кого руските медиуми го нарекоа Генерал Армагедон, беше поставен на чело на операциите во Украина во октомври, но во јануари рускиот министер за одбрана Сергеј Шојгу го назначи началникот на Генералштабот Валериј Герасимов да ја надгледува кампањата, а Суровикин стана негов заменик.
Пред да започне бунтот, Пригожин беснеел и против Шојгу и Герасимов обвинувајќи ги за неуспехот на кампањата и недостигот на армиска поддршка за борците на „Вагнер“.
Суровикин ја повика групата на „Вагнер“ да се откаже од бунтот против военото раководство и да се врати во своите бази непосредно пред Пригожин да ги поведе борците на таканаречениот „марш за правда“ кон Москва.
Фото: EPA-EFE/ALEXEI DRUZHININ / SPUTNIK