Зајкова: ЛДП е подготвена да го прифати ВМРО-ДПМНЕ како дел од Владата доколку опозицијата ги поддржи уставните измени

Го поздравуваме расположението на ВМРО-ДПМНЕ во нивниот избор да дадат поддршка во евроинтеграциските процеси и да гласаат за промена на Уставот, велат од ЛДП

Либерално-демократската партија (ЛДП) е подготвена да го прифати влегувањето на ВМРО-ДПМНЕ во владејачката коалиција доколку опозицијата ги поддржи уставните измени.

„Европската иднина на граѓаните е најважна и секако напредокот на Македонија во преговорите со Европската Унија и отворање на кластерите. И токму затоа го поздравуваме расположението на ВМРО-ДПМНЕ во нивниот избор да дадат поддршка во евроинтеграциските процеси и да гласаат за промена на Уставот“,

вели претседателката на ЛДП, Моника Зајкова.

Според Зајкова, добро е што ВМРО-ДПМНЕ не е против уставните измени, но тие да стапат на сила пред формирањето влада во која би се приклучиле како опозициска партија.

„Сите заедно имаме одговорност по кој пат ќе ја движиме државата и каков стандард ќе им обезбедиме на граѓаните“,

додава Зајкова.

Претседателот на ВМРО-ДПМНЕ, Христијан Мицкоски, по денешната лидерска средба со премиерот Димитар Ковачевски рече дека неговата партија е подготвена да влезе во влада со СДСМ и со другите политички партии, но без учество во владата на ДУИ.

Нема договор со Ковачевски, Мицкоски прифатил ВМРО-ДПМНЕ да влезе во влада без ДУИ и уставни измени, но со гаранција од ЕУ

ВМРО-ДПМНЕ, како што рече Мицкоски, е подготвена да учествува во неа со тоа што избори подготвува техничка влада, не оваа влада, 100 дена пред одржувањето на тие избори. А, евентуалните уставни измени да важат од денот кога ќе отпочне ратификацијата на пристапниот протокол на Македонија во рамките на ЕУ од парламентите на 27-те земји членки.

По средбата, премиерот Ковачевски рече дека е добро тоа што ВМРО-ДПМНЕ не е против уставни измени во државата.

Ковачевски: Добро е што ВМРО-ДПМНЕ го промени ставот, не е против уставни измени

Ковачевски на средбата излегол со предлог заеднички да се изгласаат уставните измени и потоа веднаш по завршување на овој процес, утредента ВМРО-ДПМНЕ да влезе во владата, при што СДСМ ќе ослободи половина од своите места за претставници на ВМРО-ДПМНЕ.

На тој начин, според премиерот, ќе се обезбеди влада која обединува и во која се сите политички партии кои се за европска интеграција.

Предлогот на Мицкоски за нивни влез во владата, но без ДУИ, беше прифатено од Демократската унија за интеграција, од каде што рекоа дека се согласуваат да не бидат во владата што ќе се формира откако претходно ќе се изгласаат и ќе стапат на сила уставните измени.

ДУИ прифаќа да не биде во влада што ќе се формира по усвојување на уставните измени