Портпаролката на Белата куќа изјави дека Бајден особено не го следел обвинението и дека шефот на кабинетот на Белата куќа го информирал за развојот на настаните како што биле објавени во медиумите
Американскиот претседател Џо Бајден е свесен за обвинувањата против неговиот претходник Доналд Трамп и „очигледно“ ќе ги гледа вестите, но тоа „не е негов фокус“, соопшти вечерва Белата куќа.
„Видете, претседателот ќе се фокусира на американскиот народ како и секој ден. Ова не е нешто што е во неговиот фокус. Ќе се фокусира на работите како што е осигурување да се продолжи со намалување на цените за американскиот народ. Се разбира, ова се прикажува секој ден на многу мрежи овде со часови и часови, така што претседателот ќе фати дел од вестите кога ќе има момент да ги следи вестите на денот, но ова не е неговиот фокус за денеска“,
рече портпаролката на Белата куќа, Карин Жан-Пјер, одговарајќи на прашање на Си-ен-ен.
Бајден ќе се сретне со неговите советници за наука и технологија за да разговараат за вештачката интелигенција додека во Менхетен ќе се одвива судењето на поранешниот претседател Трамп.
Портпаролката на Белата куќа изјави дека Бајден особено не го следел обвинението и дека шефот на кабинетот на Белата куќа го информирал за развојот на настаните како што биле објавени во медиумите.
Бајден во неколку наврати одби да го коментира случајот, но вчера за Си-ен-ен во Минесота изјави дека верува во полицискиот оддел во Њујорк и одговори потврдно на прашањето дали верува во правниот систем.
Доналд Трамп, поранешниот претседател на Соединетите Американски Држави, денеска се појави пред судот во Њујорк каде што ќе биде информиран за обвинението против него и каде што ќе може да се изјасни за обвинението, што претставува историски момент, имајќи предвид дека станува збор за првиот претседател во историјата на САД кој е кривично гонет.
Обвинението против Трамп го покрена Големата порота на Менхетен и се состои од повеќе од 30 точки. Тоа се однесува на вмешаноста на Трамп во плаќањето 130 000 долари на порноактерката Сторми Даниелс за да ја спречи јавно да зборува за наводната афера со него, за која таа тврди дека се случила во 2006 година.