Американскиот секретар за одбрана Лојд Остин истакна дека одмаздничките напади биле извршени по наредба на претседателот Џо Бајден врз објекти што ги користеле милитантните групи поврзани со Исламската револуционерна гарда на Иран
Американската армија изврши повеќе воздушни напади во Сирија врз цели на милитантни групи поддржани од Иран кои се одговорни за претходен напад со беспилотно летало во кој загина еден, а повредени се неколку припадници на американските сили.
Пентагон синоќа објави за нападот врз американскиот персонал и за американските воздушни напади врз милитанти.
Нападот на базата на коалициските сили кај Хасака во североисточна Сирија се случил во 13 часот и 38 минути по локално време.
Според разузнавачките информации, постои сомневање дека нападот е извршен со беспилотно летало од иранско потекло, соопшти американската армија, што може дополнително да ги влоши и онака заладените односи помеѓу Вашингтон и Техеран.
Американскиот секретар за одбрана Лојд Остин истакна дека одмаздничките напади биле извршени по наредба на претседателот Џо Бајден врз објекти што ги користеле милитантните групи поврзани со Исламската револуционерна гарда на Иран.
„Воздушните напади беа извршени како одговор на денешниот напад, како и на серија неодамнешни напади врз коалициските сили во Сирија од страна на групи поврзани со ИРГЦ“,
истакна Остин.
Американските трупи од почетокот на годината нападнати се 78 пати од групи поддржани од Иран.
Генералот Ерик Курила, командант на Централната команда на САД на Блискиот Исток, во обраќањето пред Комитетот за вооружени служби на Претставничкиот дом на САД вчера, предупреди за флота на ирански беспилотни летала.