Путин, според зборовите на Џонсон, му рекол дека тоа ќе потрае само една минута
Поранешниот британски премиер Борис Џонсон тврди дека рускиот претседател Владимир Путин му се заканил со ракетен напад во телефонски разговор што го имале во пресрет на руската инвазија во февруари 2022 година.
Тогашниот премиер на Велика Британија посочува дека Путин му рекол оти тоа ќе потрае само една минута.
Ваквите откритија Џонсон ги дава во документарецот на Би-би-си насловен „Путин против Западот“ кој се однесува на интеракциите на рускиот претседател со светските лидери.
Зборувајќи во документарецот, поранешниот британски премиер тврди дека коментарот од Путин бил даден еден ден откако тој предупредил дека војната ќе биде „крајна катастрофа“.
Во разговорот, тврди Џонсон, тој го предупредил рускиот претседател дека инвазија на Украина ќе доведе до санкции од Западот и до повеќе војници на НАТО на руските граници. Исто така, се обидел да ја одврати Русија од намерата за војна со тоа што рекол дека Украина нема да стане членка на Алијансата во догледна иднина.
„Во еден момент тој ми се закани и ми рече: ’Борис, не сакам да те повредам, но со проектил, ќе потрае само една минута‘“,
раскажува Џонсон.
Според поранешниот премиер, со оглед на опуштениот тон со кој зборувал Путин, тој смета дека рускиот претседател си играл со неговите обиди да го натера да преговара.