Станува збор за трет обид на Советот да ги избере новите шефови, кои во наредните четири години ќе раководат со овие две виши јавни обвинителства
Инаку, според дневниот ред на седницата, освен раководители вишите јавни обвинителства во Скопје и Гостивар, Советот на јавни обвинители треба да избере шефови и на шест основни јавни обвинителства – Битола, Велес, Гостивар, Кавадарци, Куманово и Штип. Членовите на Советот на истата седница треба да донесат и одлука за распишување на оглас за избор на четири јавни обвинители во Основното јавно обвинителство за гонење на организиран криминал и корупција (ОЈО ГОКК)
Советот на јавни обвинители за в петок го закажа продолжението на 70. седница на која, според дневниот ред, треба да се изберат нови шефови на вишите јавни обвинителства во Скопје и Гостивар.
Станува збор за трет обид на Советот да ги избере новите шефови, кои во наредните четири години ќе раководат со овие две виши јавни обвинителства.
На првото заседание на Советот, кое се одржа на 14 ноември, изборот се одложи бидејќи членовите немале време да ги разгледаат досиејата на кандидатите од кои дел пристигнале доцна. Претседателот на Советот, Антонио Јолевски, тогаш рече дека во тој временски интервал од час и половина, колку што чекаа новинарите за да почне седницата, барал неговите колеги да се запознаат со досиејата на кандидати за да може уште тогаш да гласаат и да изберат шефови, меѓутоа тие сепак на крајот одлучија за одложување за да си дадат повеќе време.
На второто продолжение на 70. седница на 21 ноември, пак, немаше кворум од осум членови бидејќи републичкиот обвинител Љубомир Јовески, кој е член на Советот по функција, беше на болничко лекување.
За шеф на Вишото јавно обвинителство Скопје во трка беа тројца кандидати – обвинителите Фатиме Фетаи, Бурим Рустеми и актуелниот вршител на должност на функцијата, Мустафа Хајрулахи. Но, во седумдневниот период помеѓу првото и второто продолжение на седницата Фетаи преку електронска пошта соопшти дека се повлекува.
Кратко по неа, откако Советот на јавни обвинители и по втор пат го одложи изборот за шеф на ВЈО Скопје, од трката се повлече и нејзиниот колега Рустеми, со што единствен кандидат за функцијата остана Хајрулахи.
В.д. шефот на Вишото јавно обвинителство Скопје, Мустафа Хајрулахи, во интервју за „360 степени“, во петокот минатата недела рече дека не знае и не верува оти политички притисок може да стои зад одлуките на обвинителите Фетаи и Рустеми да се повлечат од трката за нов шеф на ова обвинителство.
„На крајот на краиштата, тоа се нивни одлуки, лични одлуки и јас не би се впуштал во тоа да коментирам нечии лични одлуки“,
рече Хајрулахи.
За наводите во медиумите дека тој лично е близок до ДУИ, Хајрулахи рече дека за жал во општеството секој добива етиката и дека не знае од кои причини се појавуваат информации дека е близок со таа политичка партија.
„Навистина не можам да сфатам, читам по порталите, читам и по медиумите дека сум бил близок со ДУИ. Нека докажат, нека потврдат дека јас, навистина, сум близок со ДУИ“,
вели Хајрулахи.
Фетаи и Рустеми конкурираа за оваа позиција откако во април лани беа избрани за виши јавни обвинители.
Во трка за шеф на ВЈО Гостивар се тројца кандидати. Актуелната виша обвинителка во Гостивар Деса Пауновска, гостиварската обвинителка Душица Димитриеска која во моментов е в.д. шефица на ОЈО Гостивар и Фаик Арслани кој до неодамна беше член на Советот на јавни обвинители, а во пресрет на изборот на нов шеф си поднесе оставка. Таму досега шеф беше Ислам Абази чиј мандат истече на 14 ноември, кога тој се пресели во шефовското столче во Основното јавно обвинителство за гонење организиран криминал и корупција (ОЈО ГОКК).
За да не останат без раководители, на овие обвинителства привремено им се назначија в.д. шефови. Како вршители на должност се назначија актуелните шефови, освен во ВЈО Гостивар каде што за вршител на должност беше назначена Вјолца Имази.
Инаку, според дневниот ред на седницата, освен раководители вишите јавни обвинителства во Скопје и Гостивар, Советот на јавни обвинители треба да избере шефови и на шест Основни јавни обвинителства – Битола, Велес, Гостивар, Кавадарци, Куманово и Штип.
Членовите на Советот на истата седница треба да донесат и одлука за распишување на оглас за избор на четири јавни обвинители во Основното јавно обвинителство за гонење на организиран криминал и корупција (ОЈО ГОКК).