Докторот Арбен Аголи, педијатар од Дебар, кој е еден од петте медицински лица позитивни на коронавирусот во дебарската амбуланта, минатата среда на 11 март, бил на Централното собрание на Алијанса за Албанците во Гостивар, но вели, носел заштитна маска и ракавици.
„Бев на Централното собрание на Алијансата за Албанците, но носев заштитна маска и ракавици. Не се поздравив со никого на состанокот, седев во последниот ред, далеку од другите“,
изјави д-р Аголи за „Плусинфо“.
Резултатите од тестовите за коронавирус, кои излегоа позитивни за него и за уште три лица од персоналот во амбулантата во Дебар, беа објавени во вторникот. Еден од нивните колеги, пак, бил дијагностициран уште мината недела.
Аголи во вторникот во изјава за „360 степени“ рече дека се чувствува добро.
„Во амбулантата сме двајца педијатри и три медицински сестри, сите петмина сме позитивни на коронавирусот. Но, се чувствуваме добро. Денеска веројатно ќе останеме дома, а од утре ќе одлучат епидемиолозите како ќе продолжи лекувањето“,
изјави Аголи.
Тој упати апел до сите граѓани да се придржуваат до препораките на Владата, Министерството за здравство и апелите кои ги испраќаат медицинските лица.
„Ситуацијата станува непријатна, бидејќи сега низ Дебар се појавија случаи на различни делови од градот. Граѓаните да останат дома, да одржуваат хигиена и да ги следат препораките“,
порача докторот.