Претходно, беше објавено дека годинава околу 12 000 потрошувачи несоодветно се префрлиле од слободниот на регулираниот пазар, за што Владата најави дека доколку тие самите не се вратат, од 1 јануари 2023 година операторот на дистрибутивниот систем автоматски ќе ги префрли назад на слободниот пазар
Со воведување блок тарифи за фирмите, исто како што беа воведени и за домаќинствата, Регулаторната комисија за енергетика (РКЕ) ќе ги спречува големите компании од слободниот пазар да се префрлат на регулираниот од каде со струја се снабдуваат граѓаните и малите фирми.
Ваква мерка најави претседателот на РКЕ, Марко Бислимоски, во интервју за Радио Слободна Европа (РСЕ). Со воведување на блок тарифи, цената за струјата што би ја потрошиле големите компании ќе биде многу повисока од таа што ја плаќаат на слободниот пазар што, според Бислимоски, нема да им биле исплатливо.
„Работиме на воведување блоковска структура кај малите потрошувачи. Тие имаат помала потрошувачка и се разбира ќе има блок, со цел да се избегнат ваквите ситуации, којшто ќе има екстремно висока цена, дури можеби повисока од пазарната за на големите потрошувачи да не им се исплати да се враќаат од слободниот на регулираниот пазар. Сепак, на регулираниот пазар приоритет е да се обезбедат потребите на домаќинствата по разумни цени и исто така овие мали потрошувачи, тоа се мали бизниси, микробизниси, на коишто реално им треба поевтина електрична енергија од таа што е на слободниот пазар“,
вели Бислимоски за РСЕ.
Кон крајот на октомври, Телма ТВ објави дека околу 12 000 потрошувачи несоодветно направиле трансфер од слободниот на регулираниот пазар. Дека во текот на оваа година одредени потрошувачи несоодветно се префрлиле тогаш потврди и од РКЕ од каде наведоа дека ги информирале инспекциските служби.
Владиниот соработник за енергетика, Виктор Андонов, пред три дена на прес-конференција во Владата соопшти дека фирмите кои со манипулации влегле на регулираниот пазар, од јануари 2023 автоматски ќе бидат вратени на слободниот.
„Со оваа одлука точно е наведено дека доколку наведените правни лица до крајот на годината не се вратат самите на слободниот пазар, операторот на дистрибутивниот систем, како носител на лиценца која функционира врз основа на Законот за енергетика, ќе има обврска автоматски од први јануари 2023 година истите да ги врати на слободниот пазар“,
информираше Андонов.
Целото интервју на Бислимоски може да го прочитате ТУКА.