За еден месец отсега делницата Плетвар треба да биде готова и пуштена за во употреба. Премиерот Димитар Ковачевски денеска изјави дека 90 отсто од градежните работи се веќе завршени.
„Сега се поставуваат сообраќајна сигнализација и банкини. Верувам дека сите овде присутни напорно работат на завршните работи, и затоа ќе си дозволам уште од сега да ве поканам сите вас, на пуштањето во употреба на делницата Плетвар, важна секција во должина од 19 километри која е значајна бидејќи е дел од главниот магистрален пат за цела Пелагонија. Ова е практично е продолжување на новиот експресен пат од Градско до Плетвар“,
рече премиерот Ковачевски при увид во градежните работи.
Според премиерот, модернизацијата на инфраструктурата е суштински услов за нови инвестиции, а со тоа и на нови работни места.
„Оваа делница, но и целиот овој зафат, односно реконструкцијата која се реализира со средства од ЕБОР во вредност од над четири милиони евра, значи модернизација на Коридорот 10-Д и поврзување со Република Грција, кај граничниот премин Меџитлија.Тоа значи и отворени можности за развој на стопанството во целиот пелагониски регион“,
рече Ковачевски.
Министерот за транспорт и врски Благој Бочварски, пак, рече дека се работи и на двете фази од експресниот пат од Градско до Фариш.
„Рехабилитацијата на превојот Плетвар е во завршна фаза и очекувам до крај на овој месец да биде комплетно завршен. Ме радува фактот што силно се работи и на двете фази од експресниот пат од Градско до Фариш, проект кој е исто така од исклучителено значење за цел Пелагонски регион заради брз, безбеден и поквалитетен сообраќај“,
рече министерот Бочварски.
Најави дека во Министерството заедно со ЈП за државни патишта работи и на проектот за проширување на Плетвар на места каде што има само две ленти, да се прошири со уште една трета лента и понатаму на изградба на нов експрсен пат од мостот кај Ленишка река до влезот во Прилеп.