Спасовски: Да се изнајдат механизми за да се забрани регистрација на какви било клубови што ги повредуваат националните чувства на Македонците

Министерот потенцира дека историски факт е дека Бугарија била дел од фашистичката оска и не е логично тие кои бараат начин да се оттргнат од тоа минато тука да промовираат имиња на фашисти по клубови. За Спасовски тоа не е дозволиво

Добри односи меѓу соседите не се градат со провокации, порача министерот за внатрешни работи Оливер Спасовски во интервју за утринската програма на националната телевизија коментирајќи ги односите Република Северна Македонија и Република Бугарија и отворањето на новиот бугарски клуб со провокативно име.

Османи за клубот „Цар Борис Трети“: Тоа е провокација и е на штета на бугарската заедница во земјава

„Ги осудувам сите овие клубови коишто ги отвораат токму во овој момент. Секој од нас може да постави прашање, зошто досега не се отвораа вакви клубови туку токму сега кога започна интеграцијата на Северна Македонија во Европската Унија?! Јас сум еден од тие кои инсистира државата да изнајде механизми за да се забрани регистрација на било какви клубови кои што, пред сѐ, ќе ги повредуваат националните чувства на македонскиот народ, македонските граѓани и на Република Северна Македонија. И тие механизми мора да се изнајдат! Ние затоа, како Влада направивме едно тело кое ќе ги разгледува сите иницијативи во овој дел, меѓутоа сметам дека треба да се размислува и во делот на посебни законски одредби кои што ќе овозможат да се создаде механизам на заштита“,

истакна Спасовски.

Министерот потенцираше дека историски факт е дека Бугарија била дел од фашистичката оска и не е логично тие кои бараат начин да се оттргнат од тоа минато, тука да промовираат имиња на фашисти по клубови. За Спасовски тоа не е дозволиво.

„Република Северна Македонија е родена на придобивките на НОБ и антифашистичкото движење. Многу млади жени и мажи се изборија за слободата во тој момент кога застанаа на страната на антифашистите. Ние овие придобивки мораме да ги почитуваме. Вие не можете да одите напред ако не го почитувате сопственото минато или ако не го почитувате тоа што вас ве создало како држава. Апсолутно сум против отворање на вакви клубови, апсолутно сум против секаква провокација без разлика од каде доаѓа, заради тоа што денеска е момент кога треба да градиме добри односи“,

рече Спасовски.

Ковачевски го повика Централниот регистар да постапи за новото бугарско здружение во најава – „Цар Фердинанд“