Во видеообраќање рускиот лидер вели дека ракетите со долг дострел погодиле енергетски, воени и комуникациски објекти во Украина и вети остар одговор на какви било дополнителни „терористички“ акти на руска територија, повторно обвинувајќи ја Украина за нападот врз мостот на Крим
Во меѓувреме, претставници на Европската Унија и европски лидери ги осудија денешните ракетни напади на руската армија врз украинските градови и најавија дополнителна воена поддршка за Украина
Рускиот претседател Владимир Путин ги потврди денешните напади врз Киев и други украински градови и провинции изнесувајќи уште едно предупредување за можни напади, пишува Би-би-си.
Тој во видеообраќање вели дека ракетите со долг дострел погодиле енергетски, воени и комуникациски објекти во Украина и вети остар одговор на какви било дополнителни „терористички“ акти на руска територија, повторно обвинувајќи ја Украина за нападот врз мостот на Крим.
Во меѓувреме, претставници на Европската Унија и европски лидери ги осудија денешните ракетни напади на руската армија врз главниот град Киев и неколку други украински градови.
Претседателката на Европскиот парламент Роберта Мецола упати осуда за руските напади нарекувајќи ги криминални.
„Она што се случува сега во Киев е болно. На светот повторно му го покажува режимот со кој се соочуваме. Оној што цели неселективно. Оној што фрла ужас и смрт врз децата. Ова е криминално. Тие ќе одговараат. Украина ќе победи. Европа нема да гледа настрана“,
пишува Мецола во објава на Твитер.
What is happening now in #Kyiv is sickening.
— Roberta Metsola (@EP_President) October 10, 2022
It shows the world, again, the regime we are faced with: One that targets indiscriminately. One that rains terror & death down on children.
This is criminal. They will be held to account. Ukraine will win. Europe will not look away. pic.twitter.com/0I594UlCMg
Порака преку Твитер со слична содржина објави и европскиот комесар за заедничка надворешна и безбедносна политика Жозеп Борел, кој кажа оти на пат е дополнителна воена поддршка за Украина.
„Длабоко шокиран од нападите на Русија врз цивилите во Киев и другите градови во Украина. Ваквите дела немаат место во 21 век. Најостро ги осудувам. Ние стоиме со Украина. На пат е дополнителна воена поддршка од ЕУ“,
стои во твитер-објавата на Борел.
Deeply shocked by Russia’s attacks on civilians in #Kyiv and other cities in Ukraine.
— Josep Borrell Fontelles (@JosepBorrellF) October 10, 2022
Such acts have no place in 21st century. I condemn them in the strongest possible terms.
We stand with Ukraine. Additional military support from the EU is on its way.
Главниот портпарол за надворешни работи на ЕУ, Петер Стано, кажа дека бомбардирањата над Киев се спротивни на меѓународното хуманитарно право и со тоа претставуваат воено злосторство.
Дополнително, за Европската Унија овие дејствија претставуваат ескалација во конфликтот, особено ако на тоа се додадат изјавите на белорускиот претседател Александар Лукашенко, кој најави заеднички трупи со Русија.
Најавите за заеднички руски и белоруски трупи, ако се остварат, нема да останат без одговор од ЕУ, рече портпаролот.
Претходно денеска белорускиот претседател Александар Лукашенко изјави дека Белорусија и Русија ќе распоредат заеднички воени единици на западните граници на земјата како одговор на, како што рече, „ескалацијата на тензиите“, објави државната новинска агенција Белта.